चावंड ग्रामपंचायतीकडून पर्यटन विकास समितीची स्थापना

जुन्नर, ता. २३ : जुन्नरच्या पश्चिम आदिवासी भागातील चावंड ग्रुप ग्रामपंचायतीने संयुक्त ग्रामसभेत पर्यटन विकास समितीची स्थापना केली आहे. या वेळी एक वर्षासाठी केळी, माणकेश्वर आणि चावंड या गावांमधील १५ सदस्यांची समितीमध्ये निवड करण्यात आली.

पर्यटन विकास समितीच्या स्थापनेने चावंड परिसरातील पर्यटन विकासाला चालना मिळण्याची अपेक्षा व्यक्त करण्यात येत आहे. चावंड येथील प्रसन्नगड (चावंड किल्ला), माणकेश्वर मंदिर, कुंभाई माता मंदिर, विविध धबधबे आणि गावातील अनेक छोटी-मोठी पर्यटनस्थळे आहेत. या पर्यटनस्थळांचे जतन आणि संवर्धन करणे गरजेचे आहे. ‘निसर्ग संवर्धनाकडून पर्यटन विकासाकडे’ हे ब्रीद वाक्य मनाशी बाळगून यापुढे समितीच्या माध्यमातून पर्यटन क्षेत्रात नावीन्यपूर्ण उपक्रम राबविण्यात येणार आहेत.

चावंड ग्रामपंचायत ‘पेसा’ क्षेत्रात आहे. ग्रामपंचायत कार्यक्षेत्रात शिस्तबद्ध आणि जबाबदार पर्यटन घडवून आणण्यासाठी काही नियम तयार करण्यात येणार असून परिसरात कोणतेही कार्यक्रम घेण्यासाठी समितीची पूर्व परवानगी आवश्यक करण्यात येणार आहे. याच बरोबर पर्यटकांच्या तक्रारी, समस्या आणि मदतीसाठी पर्यटन समिती सहकार्य करणार आहे.

पर्यटन विकास समितीचे पदाधिकारी व सदस्य पुढीलप्रमाणे :
अध्यक्ष: पांडुरंग उतळे, उपाध्यक्ष: अविनाश शेळकंदे, सचिव: बबन वाळकोळी, खजिनदार: दशरथ चव्हाण, पर्यटन निवास प्रमुख: रोहिदास शेळकंदे, सदस्य: संतोष मेमाणे, निखिल उतळे, सुप्रिया शेळकंदे, संतोष लांडे, ज्ञानदेव गवारी, पुष्पा बांडे, वंदना बांबळे, ज्ञानेश्वर लांडे, एकनाथ मुंढे, रोहिदास कोरडे.