पाडळीत केबल्स चोरीमुळे शेतकरी त्रस्त

जुन्नर, ता. २ : पाडळी (ता. जुन्नर) येथील शेतकऱ्यांच्या विद्युत मोटारीच्या केबल्स चोरीस जाण्याच्या घटना वारंवार घडत असून या प्रकरणी पोलिसांनी प्रत्यक्ष पाहणी करून केबल्स चोरटे शोधून त्यांच्यावर कारवाई करावी अशी मागणी शेतकरी बांधवांनी जुन्नर पोलिसांकडे केली आहे.

याबाबतचे निवेदन शेतकरी तसेच ग्रामपंचायत पाडळी (बारव) यांच्यावतीने पोलीसांना देण्यात आले. या निवेदनावर शरद कबाडी, राजेंद्र कबाडी, बाळू पापडे व इतर २६ शेतकऱ्यांच्या सह्या आहेत.

या शेतकऱ्यांनी शेतीला पाणीपुरवठ्यासाठी कुकडी नदी किनारी विदुयत मोटारी बसविल्या आहेत. या मोटारींच्या केबल्स वारंवार चोरीला जात असल्याने याबाबत शेतकऱ्यांनी गाव पातळीवर बैठक घेऊन मार्ग काढण्याचा प्रयत्न केला मात्र त्यास यश आले नाही. मागील आठवड्यात सुमारे ३५ ते ४० शेतकऱ्यांच्या केबल चोरीला गेल्याची घटना घडली असून यामध्ये शेतकऱ्यांचे लाखो रुपयांचे नुकसान झाले आहे. केबल चोरीच्या घटनांचा तपास करून शेतकऱ्यांना न्याय मिळावा अशी विनंती करण्यात आली आहे. यावेळी ग्रामपंचायतीचे आजी माजी सरपंच, उपसरपंच, सदस्य तसेच शेतकरी मोठ्या संख्येने उपस्थित होते.