‘विघ्नहर’च्या चार जागांसाठी आज होणार मतदान

जुन्नर, ता.१४ : निवृत्तीनगर-धालेवाडी (ता. जुन्नर) येथील श्री विघ्नहर सहकारी साखर कारखान्याच्या संचालक मंडळाच्या चार जागांसाठी (शनिवारी, ता.१५) होणाऱ्या मतदान होणार आहे. यासाठी शुक्रवारी (ता.१४) मतदान कर्मचाऱ्यांना मतदान साहित्याचे वाटप करण्यात आले, अशी माहिती निवडणूक निर्णय अधिकारी गोविंद शिंदे यांनी दिली.
मतदान शनिवारी (ता.१५) सकाळी ८ सायंकाळी ५ वाजेपर्यंत आहे. यासाठी केंद्राध्यक्ष व मतदान अधिकारी क्रमांक एक, दोन व तीन व शिपाई प्रत्येकी २० याप्रमाणे १०० कर्मचारी मतदान साहित्य घेऊन शिरोली बुद्रुक येथील श्री निवृत्तीशेठ शेरकर सांस्कृतिक भवन येथून मतदान केंद्रावर रवाना झाले.
चार जागांसाठी एकूण पाच मतदार संघांमध्ये मतदान होणार आहे. यासाठी उत्पादक मतदार संघांच्या जुन्नर (३), शिरोली बुद्रुक (५),ओतूर (३), पिंपळवंडी (७), घोडेगाव (२) या चार गटात एकूण वीस मतदान केंद्रे आहेत. एकूण मतदार १९ हजार ६२७ आहेत. मतदान साहित्य वाटप तसेच मतदानाची आकडेवारी घेण्यासाठी गटनिहाय एकूण दहा सहायक महसूल कर्मचारी नियुक्त करण्यात आले आहेत.
मतदान केंद्रांवर पुरेसा पोलिस बंदोबस्त देण्यात आला आहे. यात एक पोलिस निरिक्षकासह,सात अधिकारी,पोलिस हवालदार व शिपाई असे एकूण ४०  कर्मचारी तैनात करण्यात आले आहेत.
निवृत्तीशेठ शेरकर सांस्कृतिक भवन येथील  मतमोजणी कक्षामध्ये (रविवार, ता.१६ रोजी) एकूण २० टेबलवर  सकाळी नऊ वाजता मतमोजणी सुरू करण्यात येणार आहे. अंतिम निकाल दुपारी १२ पर्यंत येणे अपेक्षित आहे, असे निवडणूक निर्णय अधिकारी  शिंदे यांनी सांगितले.