‘आदिस्वयम’ लघुपटाचे जतन करण्याची मागणी

जुन्नर, ता. ८ : आदिवासी चित्रपट महोत्सवात केंद्रीय सेन्सॉर बोर्डाचे प्रमाणपत्र नसल्याने प्रसारणास अपात्र ठरलेला ‘आदिस्वयम’ हा लघुपट प्रसारणास पात्र करून घ्यावा. हा लघुपट आदिवासी संशोधन आणि प्रशिक्षण संस्थेकडे जतन करण्यासाठी सुपूर्त करावा अशी मागणी आदिवासी नाट्य चित्रपट रंगकर्मी आणि पेसा अभ्यासक डॉ. कुंडलिक केदारी यांनी ठाणे येथील आदिवासी विकास विभागाच्या अप्पर आयुक्तांकडे केली आहे.
याविषयी डॉ. केदारी म्हणाले, घोडेगाव (ता. आंबेगाव) येथील एकात्मिक आदिवासी विकास प्रकल्प कार्यालयाने २०२२-२३ न्युक्लिअर बजेट (केंद्रीय अर्थसंकल्प) योजनेअंतर्गत आदिवासी जमाती त्यांची कला संस्कृती संवर्धन, सक्सेस स्टोरी या विषयी लघुपट, माहितीपट बनविण्याची योजना राबविली. ह्या योजनेची जाहिरात देखील करण्यात आली. केदारी यांनी माहिती अधिकारात हा लघुपट १८ व्या आंतरराष्ट्रीय आदिवासी चित्रपट महोत्सव २०२५ साठी प्रदर्शनास मिळावा तसेच लघुपटाची कथा, सारांश याची माहिती मिळावी अशी मागणी केली. यावेळी भोसरी-पुणे येथील रंगमैत्री यांनी बनविलेला ‘आदिस्वयम’ लघुपटाला केंद्रीय सेन्सॉर बोर्डाचे प्रमाणपत्र नसल्याचे स्पष्ट झाले, यामुळे हा लघुपट प्रसारणास अपात्र ठरला आल्याचे माहिती अधिकारात आढळून आले. त्यामुळे त्याला सेन्सॉर बोर्डाचे प्रमाणपत्र प्राप्त होण्यासाठी केदारी यांनी मागणी केली आहे.