रात्रीची माती वाहतूक न थांबविल्यास आंदोलन

जुन्नर, ता.१० : महसूल विभागाने रात्रीच्या वेळी आपटाळे- नाणेघाट रस्त्यावर होणारी माती वाहतूक थांबवावी. अन्यथा या रस्त्यावर उद्या शनिवारपासून (ता.१०) दररोज रात्रीच्या वेळी रस्ता रोको आंदोलन करण्यात येईल, असा इशारा पुणे जिल्हा दूध संघाचे माजी उपाध्यक्ष भाऊसाहेब देवाडे यांनी दिला आहे.
याबाबतचे निवेदन तहसील कार्यालय व जुन्नर पोलिसांना देण्यात आले आहे. या मार्गाने रात्री मातीची वाहतूक मोठ्या प्रमाणात सुरू आहे. टिप्पर,दहा टायर गाड्या व डंपर अशा मोठ्या व अवजड वाहनांनी माती वाहतूक केली जात आहे. नियमबाह्य पद्धतीने मातीची वाहतूक करणाऱ्या वाहनांवर संबंधितांनी तत्काळ कारवाई करावी, असे निवेदनात नमूद केले आहे.
तालुक्याच्या पश्चिम आदिवासी भागात नियमबाह्य पद्धतीने रात्रीच्या वेळेला माती चोरी अधिक प्रमाणात होत असल्याच्या नागरिकांच्या तक्रारी आहेत.महसूल व पोलिस प्रशासन याकडे डोळे झाक करत असल्याचे नागरिकांचे म्हणणे आहे.रात्री मातीची चोरटी वाहतूक करणाऱ्या वाहनांना नंबर प्लेट नाहीत.वाहनांचा कर्कश आवाजाने आपटाळे परिसरातील नागरिक त्रस्त झाले आहेत.रात्रीची शांतता भंग पावली जात आहे असे देवाडे यांनी सांगितले.
दरम्यान शुक्रवारी (ता.१) रात्री दीड वाजण्याच्या सुमारास आपटाळे गावाजवळ लोकवस्तीच्या बाजूला डंपर पलटी झाला होता. सुदैवाने जीवित हानी झाली नाही. तथापि डंपर ज्या रस्त्यावर पलटी झाला आहे त्या ठिकाणी रस्ता खराब झाला आहे. नियमबाह्य मातीची वाहतूक करणाऱ्या वाहनांवर कारवाई करावी. अन्यथा आपटाळे- नाणेघाट रस्त्यावर रास्ता रोको आंदोलन करण्यात येईल असे निवेदनात म्हटले आहे.