खताची लिंकिंग थांबविण्याची वितरकांची मागणी

जुन्नर, ता.२३ : शेतकरी व विक्रेता यांचे नाते अधिक दृढ होण्यासाठी युरिया खतासोबत इतर खताची लिंकिंग करून नये. यासाठी लोकप्रतिनिधींनी प्रयत्न करावेत अशी मागणी वितरक प्रतिनिधीच्या वतीने मुकुल गावडे यांनी खरीप हंगाम आढावा बैठकीत बोलताना केली.
महाराष्ट्र शासन कृषी विभाग व पंचायत समिती कृषी विभाग यांच्या संयुक्त विद्यमाने जुन्नर तालुका पंचायत समितीच्या राजमाता जिजाऊ सभागृहात खरीप पूर्व हंगाम आढावा बैठकीचे गुरुवारी (ता.२२) आयोजन केले होते. जुन्नरचे आमदार शरद सोनवणे अध्यक्षस्थानी होते. यावेळी खत-औषधे विक्रेत्यांनी आपल्या व्यथा मांडल्या.
लिंकिंग खतामुळे विक्रेता मेटाकुटीला आला आहे. विक्रेत्याचे लिंकिंग बंद करावे. त्यामुळे शेतकरी व विक्रेता यांच्यात होणारे वाद विवाद दूर होतील, असे मत वितरक अजित वाजगे व राजू वामन यांनी व्यक्त केले.
यावेळी प्रभारी तहसीलदार सारिका रासकर, प्रभारी गटविकास अधिकारी विठ्ठल भोईर, तालुका कृषी अधिकारी गणेश भोसले, तालुका पंचायत समितीचे कृषी अधिकारी नीलेश बुधवंत, मंडल कृषी अधिकारी, कृषी विस्तार अधिकारी, कृषी पर्यवेक्षक, खते, औषधे बियाणे विक्रेते व शेतकरी उपस्थित होते.
यावेळी तालुका कृषी अधिकारी गणेश भोसले यांनी खरीप हंगाम पूर्व नियोजन सादर केले तसेच कृषी विभागाच्या विविध योजनांची माहिती दिली. शेतकरी प्रतिनिधी म्हणून राजाराम चौधरी यांनी मनोगत व्यक्त केले.

‘कोल्ड स्टोरेज उभारणी प्रयत्न करणार’
उत्पादक शेतकरी, विक्रेते व अधिकारी यांची दर तीन महिन्याला आढावा बैठक घेण्याचे नियोजन केले आहे. राज्यातील सर्वात जास्त भाजीपाला,फळे व फूल शेती पिकविणारा शेतकरी जुन्नर तालुक्यातील आहे. येथील शेतकऱ्यांसाठी अत्याधुनिक माहिती केंद्र, प्रशिक्षण केंद्र असलेले महाराष्ट्रातील सर्वोत्तम शेतकरी भवन बांधणार आहे. अन्नधान्य,भाजीपाला, फळपिके आदी नाशवंत शेतमाल ठेवण्यासाठी मेगा फूड पार्क, जैविक निविष्ठा केंद्र उभारणी तसेच द्राक्षे व केळी पिकासाठी कोल्ड स्टोरेज उभारणी आदींसाठी प्रयत्न करणार असल्याचे आमदार सोनवणे यांनी सांगितले.