कृषी निविष्ठांबाबत अडचण आल्यास कारवाई

जुन्नर, ता.३० : ‘‘शेतकऱ्यांना निविष्ठांबाबत कोणत्याही प्रकारची अडचण आल्यास भरारी पथकामार्फत संबंधित विक्रेत्यावर कारवाई केली जाईल,’’ असा इशारा गुण नियंत्रण निरीक्षक तथा जुन्नर तालुका पंचायत समितीचे कृषी अधिकारी नीलेश बुधवंत यांनी दिला आहे.
यंदा देखील तालुकास्तरावर भरारी पथकाची स्थापना केली असून त्यामध्ये तालुका कृषी अधिकारी,कृषी अधिकारी व वजन मापे निरीक्षक यांचा समावेश आहे. ज्या ठिकाणी जादा दराने निविष्ठांची विक्री होत आहे, निविष्ठा असून, देखील दिल्या जात नाहीत,एखाद्या निविष्ठेबरोबर दुसरी निविष्ठा घेण्यासाठी दबाव आणला जाईल तसेच प्रत्यक्ष गोदामामधील साठा व पॉस मशिनवरील साठा यामध्ये तफावत आढळून येईल अशा विक्रेत्यावर कडक कारवाई केली जाणार असल्याचे बुधवंत यांनी स्पष्ट केले.
शेतकऱ्यांनी देखील खत खरेदी करताना आपले आधार कार्ड सोबत ठेवणे गरजेचे आहे.विक्रेत्यांनी पॉस मशिनवरून खतांची विक्री करणे अत्यावश्यक असून तपासणी वेळी मशिन वरील साठा व प्रत्यक्ष गोडाऊनमध्ये साठा यामध्ये तफावत आढळून आल्यास कारवाई करण्याचे संकेत त्यांनी दिले.
शेतकऱ्यांनी बियाणे खरेदी करताना विक्रेत्याकडून पावती घेणे गरजेचे असून त्या पावत्यावरील सर्व बाबी नमूद केल्या आहेत का नाही हे पाहणे देखील गरजेचे आहे.विक्रेत्यांनी देखील सर्व शेतकऱ्यांना निविष्ठा विक्रीच्या पावती देणे तसेच पावतीवरील सर्व बाबी भरणे बंधनकारक आहे.कोणत्याही परिस्थितीत विक्रेत्यांनी मुदतबाह्य औषधांची,बियाण्याची विक्री करता कामा नये असा प्रकार आढळून आल्यास संबंधितांवर योग्य ती कारवाई केली जाणार आहे.

विक्री परवान्यांमध्ये समाविष्ट नसलेल्या कोणत्याही निविष्ठांची आपणाकडून विक्री होणार नाही. याची दक्षता घेणे गरजेचे आहे. सर्व विक्रेत्यांनी आपापल्या विक्री केंद्राबाहेर शेतकऱ्यांना स्पष्ट दिसेल असा साठा व भाव फलक लावणे बंधनकारक आहे विक्री केंद्रामध्ये खत बियाणे औषध उपलब्ध असताना देखील शेतकऱ्यांना नाही म्हणणे चुकीचे आहे. असा प्रकार आढळून आल्यास संबंधित विक्री केंद्रावर कारवाई केली जाईल
- नीलेश बुधवंत, जुन्नर तालुका पंचायत समितीचे कृषी अधिकारी