बेरोजगारी प्रश्नाचा लढा तीव्र करण्याचा निर्णय

जुन्नर, ता. २० : डेमोक्रेटीक युथ फेडरेशन ऑफ इंडिया (DYFI) जुन्नर तालुका समितीच्या अधिवेशनात बेरोजगारी, अन्याय-अत्याचार, सरकारी योजना आदी प्रश्नांबाबतचा लढा तीव्र करण्याचे ठराव एकमताने मंजूर करण्यात आले.
संघटनेचे तालुका अधिवेशन जुन्नर येथील प्रभाकर संझगिरी स्मृतीभवन येथे झाले. मार्क्सवादी कम्युनिस्ट पक्षाचे तालुका सचिव गणपत घोडे यांनी अधिवेशनाचे उद्‍घाटन केले. जनआरोग्य मंचाचे डॉ. महारुद्र डाके यांनी युवक चळवळीपुढील आव्हाने व संघटना बांधणी याविषयावर मार्गदर्शन केले. किसान सभेचे तालुका सचिव लक्ष्मण जोशी, अंनिसचे तालुका समन्वयक सीताराम शिंदे, आदिवासी अधिकार राष्ट्रीय मंचाचे प्रा. संजय साबळे, एसएफआयचे सचिव मंडळ सदस्य संदीप मरभळ, तालुका सचिव सूरज बांबळे, शिक्षक समितीचे नेते नारायण मराडे यांनी यावेळी विविध विषयांवर मार्गदर्शन केले.
या अधिवेशनात तालुक्यातील सामाजिक, राजकीय व बेरोजगारी विषयी चर्चा करण्यात आली. यानंतर बेरोजगारी विषयीचा लढा तीव्र करा यासह चार ठराव मांडण्यात आले. हे ठराव सभागृहातील ४१ प्रतिनिधींनी एकमताने मंजूर करत तीव्र लढ्याची हाक दिली. तसेच प्रत्येक गावामधील स्थानिक प्रश्नांना घेऊन लढा उभा करण्याचे ठरविण्यात आले. सीताराम शिंदे यांनी प्रबोधनपर गीत गायन केले. शिवाजी लोखंडे यांनी आभार मानले.