शिवजन्मभूमी विक्रेता संघाचा आजपासून उपोषणाचा इशारा

जुन्नर, ता. ६ : कुसूर (ता. जुन्नर) येथील किल्ले शिवनेरी शिवजन्मभूमी विक्रेता सेवा संघाने शिवनेरीच्या पायथ्याशी परंपरागत व्यवसाय पुन्हा सुरू करण्यासाठी आमरण उपोषणाचा इशारा दिला आहे. शिवनेरीच्या पायथ्याशी असलेल्या छत्रपती शिवाजी महाराज स्मारक चौक येथे सोमवारपासून (ता. ७) उपोषण करण्यात येणार आहे. उपोषण करण्याबाबत ग्रामीण पोलिस अधिक्षक, महसूल विभाग, वनविभाग, पुरातत्त्व विभागाच्या वरिष्ठ अधिकाऱ्यांना निवेदनाच्या प्रती पाठविण्यात आल्या आहेत. शिवनेरीच्या पायथ्याशी राहणाऱ्या शालिनी बोचरे, अंजली दुराफे, सीमा बोचरे, प्रगती दुराफे, संगीता दुराफे, नवनाथ दुराफे, अंजली बोचरे, किसन बोचरे, प्रकाश मोधे, किसन घोगरे, लक्ष्मण बोचरे या व्यावसायिकांनी निवेदन दिले आहे.
शिवनेरीवर येणाऱ्या पर्यटक व शिवभक्तांना वंशपरंपरेने पारंपारिक अन्न पदार्थ, दूध, दही, ताक, लस्सी, लिंबू- पाणी, शिवनेरीची प्रतिकृती, गडकिल्ल्याचे फोटो, झेंडे, पताका आदी साहित्य विक्रीचा व्यवसाय करत होतो. गडाच्या पायथ्यालगत हा व्यवसाय करण्यास वनविभाग व पुरातत्त्व प्रतिबंध केला आहे. व्यवसाय बंद झाल्याने उदरनिर्वाहाचा प्रश्न निर्माण झाला आहे. कुटुंबावर उपासमारीची वेळ आली असल्याचे निवेदनात नमूद केले आहे.