‘पेसा’ पुरस्कारासाठी ग्रामसेवकांना आवाहन

जुन्नर, ता. ८ : पुणे येथील बहुरंग संस्थेच्या वतीने देण्यात येणाऱ्या यावर्षीच्या ‘आदिवासी कला संस्कृती संवर्धन व जतन पेसा पुरस्कार २०२५’साठी ग्रामसेवकांकडून प्रस्ताव मागविले आहेत.
संस्थेचे अध्यक्ष डॉ. कुंडलिक केदारी यांनी याविषयीचे निवेदन प्रसिद्धीस दिले आहे. यात राज्यातील १३ पेसा जिल्हा परिषद स्तरावर हा पुरस्कार वितरित करण्यात येणार आहे. ग्रामसभा सक्षम करून ‘पेसा व वनहक्क कायदा’ याची उत्तम अंमलबजावणी करणाऱ्या ग्रामसेवक/ ग्रामविकास अधिकारी यांना हा पुरस्कार देण्यात येतो. यंदाचे पुरस्काराचे चौथे वर्ष आहे. पुरस्काराचे स्वरूप रोख रक्कम, सन्मानपत्र, सन्मानचिन्ह असे असून, पुणे येथे सन्मानपूर्वक प्रदान करण्यात येणार आहे.
यासाठी २१ एप्रिल २०१५ चा शासन निर्णय आणि २१ ऑगस्ट २०१५ ची मार्गदर्शक तत्त्वे केंद्रस्थानी ठेऊन विनियोग सूत्र ‘ब’नुसार पेसा व वनहक्क कायदा अंमलबजावणी, तसेच आदिवासी कला संस्कृती जतन व संवर्धन या वैशिष्ट्यपूर्ण कामाचा पुरस्कारासाठी प्रामुख्याने विचार केला जाणार आहे. प्राप्त प्रस्तावातून प्रत्येक जिल्ह्यासाठी एक पुरस्कार्थीची निवड केली जाणार आहे. प्रस्ताव ३१ जुलैपर्यंत ‘डॉ. कुंडलिक केदारी (फोन नंबर ०२०-२५६५०६२५ मोबाईल क्र. ९४२२३१८३१८), अध्यक्ष, बहुरंग, पुणे, २४/५९९, पवन सहकारी गृहनिर्माण संस्था, गोखले नगर, पुणे ४११०१६’ या पत्त्यावर पाठवावेत, असे आवाहन केले आहे.