जुन्नरच्या पश्चिम भागात तीस टक्के भात लागवड

जुन्नर, ता. ९ : जुन्नर तालुक्याच्या पश्चिम आदिवासी भागात भात लागवडीची कामे प्रगतीपथावर असून, सुमारे तीस टक्के भात लागवड झाली आहे, असे कृषी विभागाकडून सांगण्यात आले.
यंदा मे महिन्यात जवळपास तीन आठवडे पाऊस झाला.या पावसामुळे भात पेरणीची तसेच शेती मशागतीची कामे करण्यासाठी पुरेसा वेळ मिळाला नाही. रोहिणी नक्षत्र ते मृग नक्षत्राच्या दरम्यान धुळवाफेवरची पेरणी करतात. यावर्षी अशी पेरणी करण्यासाठी धूळ वाफच उपलब्ध झाली नाही. मृग नक्षत्र सुरू झाल्यानंतर पावसाने थोडीफार उघडीप दिली. या काळात काही शेतकऱ्यांनी भात पेरणीला सुरुवात केली.आदिवासी भागात भात हेच खरीप हंगामातील मुख्य पीक असून सुमारे १३ हजार ९९२ हेक्टर क्षेत्रात भाताची लागवड अपेक्षित आहे.
कृषी विभागाच्या वतीने भात लागवडीसाठी शेतकऱ्यांना मार्गदर्शन केले जाते. यामुळे चारसूत्री पद्धतीने भात लागवड करण्याकडे शेतकऱ्यांचा कल वाढला असल्याचे उपकृषी अधिकारी भारती मडके यांनी सांगितले.
दरम्यान, संकरित वाणांच्या रोपांच्या एक ते दोन काड्या लावल्या जातात. त्यांना साधारण ७० ते ८० फुटवे येतात. पूर्वी आदिवासी भागात पेरभात देखील केले जायचे. त्याला ढवळभात असे म्हटले जात असे. ज्या जमिनीत वाहते पाणी कमी पोचते अशा वरकस जमिनीत फेरभाताची पेरणी केली जात असे. आता हे प्रमाण फार कमी झाले आहे. युरिया खताचा पुरवठा तत्काळ करावा, अशी मागणी शेतकऱ्यांकडून होत आहे.
युरिया ब्रिकेट भातलागवड केल्यावर भातरोपाच्या मुळाजवळ खोचले जाते. त्यामुळे खत वाया जात नाही. युरिया ब्रिकेटमुळे भाताच्या चुडांचीच जोमदार वाढ होते, फुटव्यांची संख्या वाढते. यासाठी युरिया ब्रिकेटची मागणी वाढत असल्याचे भात उत्पादक शेतकरी रावजी तळपे यांनी सांगितले.

08761