मुलीच्या छेडछाडप्रकरणी जुन्नरमध्ये दोघांना अटक

जुन्नर, ता. ११ : अल्पवयीन शालेय विद्यार्थिनीच्या छेडछाडप्रकरणी जुन्नर पोलिसांनी दोघांना अटक केली आहे. त्यांच्या विरुद्ध बालकांचे लैंगिक अपराधांपासून अधिनियम २०१२ चे कलम १२, तसेच भारतीय न्याय संहितेच्या विविध कलमान्वये गुन्हा दाखल केला असल्याचे पोलिस निरीक्षक किरण अवचर यांनी सांगितले. मयूर बाळू ठोमगिरे व नीलेश मनोहर वाणी (रा. गोळेगाव, ता. जुन्नर) अशी दोघा आरोपींची नावे आहेत. पीडित मुलगी मैत्रीणीसमवेत घरी जाण्यासाठी जुन्नरच्या एसटी बसस्थानकात उभी असताना आरोपींकडून जवळीक साधण्याचा प्रयत्न करण्यात आल्याचे फिर्यादीत नमूद केले आहे. याबाबत जुन्नर पोलिस ठाण्याचे सहाय्यक पोलिस निरीक्षक मोरे पुढील तपास करत आहेत.