गाईसह कड्यावरून कोसळल्याने धामणखेलमधील शेतकऱ्यांचा मृत्यू

जुन्नर,ता.२३ : जुन्नरजवळील मानमोडी डोंगरावरील कड्यावरुन खाली कोसळल्याने शंकर वामन कोंडे (वय ६५, रा.धामणखेल, ता.जुन्नर) याचा मृत्यू झाला. ही घटना मंगळवारी (ता.२२) दुपारी अंबा-अंबिका बुद्ध लेणीजवळ घडली. अशी माहिती पोलिस निरीक्षक किरण अवचर यांनी सांगितले.
कोंडे आपल्या दोन गायी चारण्यासाठी मानमोडी डोंगरावर घेऊन गेला होता. डोंगरावर गायी चरत असताना एक गाय कड्यावरून खाली घसरत असल्याचे पाहून तिला वाचविण्यासाठी गेले असता ते गायीसह कड्यावरून खाली पडल्याने गंभीर जखमी झाले. डोंगराच्या पायथ्याशी शेतात काम करत असलेल्या शेतकरी महांबरे (पूर्ण नाव कळले नाही) यांनी ही घटना धामनखेल येथील संतोष जाधव यांना फोन करून कळविली. त्यानंतर शिवाजी कोंडे व ग्रामस्थांनी त्याठिकाणी जाऊन पाहिले. त्यावेळी शंकर कोंडे याच्या डोक्याला, हातापायांना व इतर ठिकाणी मार लागला होता. जखमी कोंडे यांना जुन्नर येथील ग्रामीण रुग्णालयात आणले असता डॉक्टरांनी तपासून मृत घोषित केले. घटनेबाबत शिवाजी श्रीपत कोंडे यांनी दिलेल्या खबरीवरून जुन्नर पोलिसांनी आकस्मिक मयत अशी नोंद केली.