पतसंस्थांचे दिवाळी किराणा वाटप बंद करा

जुन्नर, ता. ३१ : तालुक्यातील पतसंस्था सभासदांना दिवाळीला किराणा, तसेच भेट वस्तूचे वाटप करतात. यामुळे स्थानिक व्यापाऱ्यांच्या व्यवसायावर मोठा परिणाम होत असल्याने व्यापारी संघटनांनी हे वाटप बंद करण्याची मागणी केली आहे.
जुन्नर तालुका डिस्ट्रिब्युटर्स असोसिएशन, जुन्नर तालुका रिटेलर व्यापारी असोसिएशन व पुणे जिल्हा रिटेलर व्यापारी असोसिएशनच्या वतीने जुन्नरच्या सहाय्यक निबंधकांना याबाबतचे निवेदन दिले आहे. गेल्या काही वर्षांपासून पतसंस्थामार्फत दिवाळीत किराणा वाटप करण्यात येत आहे. यात तेल, तूप, रवा, मैदा, साखर, पोहे, उटणे, साबण आदी वस्तूंचा समावेश असतो. तालुक्यातील प्रमुख पतसंस्थांच्या हजारो सभासदांना किराणा किट वितरित केले जात असल्याने छोटे किराणा व्यावसायिकांवर गदा येत आहे. दिवाळी सणावर जुन्नर तालुक्यातील सुमारे चार हजार व्यापारी वर्गाचा उदरनिर्वाह चालत असतो. याच कालावधीत विविध पतसंस्थेचे वाटप होत असते. यामुळे स्थानिक व्यापारी त्रस्त झाले असून, त्यांच्या उपजिवेकेवर गदा येत असल्याचे निवेदनात नमूद केले आहे.
यावेळी जुन्नर, ओतूर, आळेफाटा, बेल्हा, नारायणगाव येथील व्यापारी संघटनांचे पदाधिकारी नीलेश जाधव, नितीन गाजरे, सुनील चांदवडकर, संजय दिवटे, नितीन पन्हाळे, विमलेश गांधी, कल्पेश गुगळे, आनंद गुगळे, संदीप शहा, सुनील शिंदे, प्रशांत फल्ले, आशिष गांधी आदी उपस्थित होते.
जुन्नरचे सहाय्यक निबंधक डॉ. गजेंद्र देशमुख यांच्याशी व्यापारी संघटनेच्या पदाधिकाऱ्यांनी चर्चा केली, तसेच संस्थांना अशा प्रकारचे वाटप करता येत नसल्याचे परिपत्रक असल्याचे सांगून हे वाटप थांबवावे, अशी मागणी केली आहे.