पशुसंवर्धन योजनेतील लाभार्थ्यांना पशुधनाचे वाटप करण्याची मागणी

जुन्नर, ता. ३ : पशुसंवर्धन योजनेत निवड झालेल्या व स्व हिस्सा भरलेल्या लाभार्थ्यांना पशुधनाचे तत्काळ वाटप करावे, अशी मागणी डेमॉक्रेटिक युथ फेडरेशन ऑफ इंडियाच्या जुन्नर तालुका समितीच्या वतीने करण्यात आली.
संघटनेच्या वतीने जुन्नर तालुका पंचायत समितीचे गटविकास अधिकारी प्रतीक चन्नावार व पशुसंवर्धन विभागाचे पशुधन विकास अधिकारी डॉ. सागर परदेशी यांना याबाबतचे निवेदन दिले आहे. पशुधन वाटप न झाल्यास आंदोलनाचा इशाराही दिला आहे. यावेळी संघटनेचे तालुकाध्यक्ष कृष्णा दुधवडे, सचिव राजेंद्र शेळके, सदस्य मनोज कारभळ, राहुल मते, अशोक साबळे, नितीन भवारी, अशोक कोकणे आदी उपस्थित होते.
पशुसंवर्धन विभागामार्फत दरवर्षी गाय व म्हशी गट, शेळी व मेंढी पालन गट, कुकूट पालन गट या योजना राबविल्या जातात. पशुसंवर्धन विभागाने डिसेंबर २०२४ मध्ये लाभार्थ्यांकडून स्व हिस्सा भरून घेतला आहे. त्या लाभार्थ्यांना अद्याप पशुधन मिळाले नाही. यामुळे ज्या लाभार्थ्यांची निवड झाली आहे त्यांना आर्थिक नुकसानीला सामोरे जावे लागत आहे.
गटविकास अधिकारी चन्नावार यांनी संघटनेच्या शिष्टमंडळाशी या पश्नाबाबत चर्चा केली. यावेळी याबाबत तत्काळ मार्ग काढण्यात येईल व निवड झालेल्या लाभार्थ्यांना पशुधन उपलब्ध करून देण्यात येईल असे सांगितले.