वडगाव सहाणीला उद्यापासून कबड्डी स्पर्धा

जुन्नर, ता. १४ : वडगाव सहाणी (ता. जुन्नर) येथे श्रीकृष्ण जन्माष्टमीनिमित्त शनिवार (ता. १६) ते रविवार (ता. १७) दोन दिवस पुरुष व महिलांच्या खुल्या गटातील मॅटवरील कबड्डी स्पर्धाचे आयोजन केले आहे. वायुकुमार चषक स्पर्धेचे यंदाचे ५३ वे वर्ष आहे.
येथील वायुकुमार विकास मंडळ व राधाकृष्ण महिला मंडळाच्या वतीने तसेच पुणे जिल्हा कबड्डी असोसिएशनच्या मान्यतेने शरदचंद्रजी पवार इनडोअर कबड्डी स्टेडिअममध्ये या स्पर्धा होणार आहेत. स्पर्धेतील पुरुष व महिला गटातील विजयी व उपविजयी तसेच उपांत्य विजयी संघास चषक व रोख बक्षीसे देण्यात येणार आहेत. पुणे जिल्हा कबड्डी असोसिएशनचे अध्यक्ष माजी आमदार अतुल बेनके यांच्या अध्यक्षतेखाली व डॉ. उमाकांत वाबळे, संतोष चव्हाण, दत्तात्रेय वालवडकर, सुभाष वाबळे, प्रियांका शेळके आदींच्या उपस्थितीत स्पर्धेचे उद्‍घाटन होणार आहे. तसेच परिसरातील विविध विकासकामांचे देखील उद्‍घाटन बेनके यांच्या हस्ते करण्यात येणार आहे.