जुन्नरमध्ये मोठा पोलिस बंदोबस्त

जुन्नर, ता. ५ : गणेश विसर्जन मिरवणुकीसाठी पुरेसा बंदोबस्त ठेवण्यात आला असून, मानाच्या पंधरा गणेश मंडळांनी वेळेत मिरवणुकीत सहभागी व्हावे, ही मिरवणूक उत्साहात व शांततेत पार पाडावी, असे आवाहन पोलिस निरीक्षक किरण अवचर यांनी केले.
विसर्जन मिरवणुकीसाठी पाच अधिकारी, जुन्नर पोलिस ठाण्यातील ३० कर्मचारी, पंधरा अंमलदार असलेले एक जलद कृती दल पथक, २० अंमलदार असणारी दोन स्ट्रायकिंग पथके, राज्य राखीव पोलिस दलाचे २५ कर्मचाऱ्यांचे एक पथक, तसेच २५ गृहरक्षक दलाचे जवान बंदोबस्तासाठी तैनात केले आहेत. जुन्नर शहरातील मानाच्या पंधरा गणेश मंडळाची मिरवणूक रविवार पेठ येथून सकाळी ११ वाजता सुरू होईल. त्यापूर्वी अन्य गणेश मंडळे सकाळी लवकर स्वतंत्र मिरवणूक काढून गणेश विसर्जन करतील. घरगुती व सार्वजनिक गणपतीचे विसर्जन कृत्रिम हौदात करावे, तसेच निर्माल्य कलशात निर्माल्य टाकून कुकडी नदीतील जल प्रदूषण टाळण्याचे आवाहन मुख्याधिकारी चरण कोल्हे यांनी केले.