कर्ज मिळवून देतो सांगून फसवणूक

जुन्नर, ता. ९ : एक कोटीचे कर्ज मंजूर करून देतो, असे सांगून वडज (ता. जुन्नर) येथील चौघांनी संगनमताने ३ लाख ५८ हजार १८ रुपयांचा अपहार करून आर्थिक फसवणूक केल्याप्रकरणी गुन्हा दाखल केल्याची माहिती पोलिस निरीक्षक किरण अवचर यांनी दिली.
याबाबतची फिर्याद सागर मारुती काशीद (सध्या रा. डोबिंवली, ता. कल्याण, जि. ठाणे; मूळ रा. चिचोली काशीद, ता. जुन्नर) यांनी जुन्नर पोलिसांकडे दिली आहे. पोलिसांनी उमेश उद्धव चव्हाण, रहीम इनामदार, आयना इनामदार, शबाना रहीम इनामदार (सर्व रा. वडज) यांच्या विरुद्ध गुन्हा दाखल केला आहे. वडज येथे २० मार्च ते ३ जूनदरम्यान ही घटना घडली आहे. आरोपींनी कर्ज मंजूर करून देतो, असा विश्वास दाखवून वेळोवेळी तीन लाख ५८ हजाराची रक्कम घेऊन विश्वासघात केला असल्याचे फिर्यादीत नमूद केले आहे.