विविध मागण्यांसाठी ग्रामस्थांचे कबाडवाडी चौकात रास्तारोको

जुन्नर, ता. ३ : येथील माणिकडोह- कबाडवाडी चौकात सातत्याने अपघात होत असल्याने उपाययोजना कराव्यात, या मागणीसाठी पंचक्रोशीतील विविध गावच्या ग्रामस्थांनी सोमवारी (ता. ३) रास्तारोको आंदोलन केले.
कबाडवाडी, माणिकडोह, खामगाव, पिंपळगाव- सिद्धनाथ व गोद्रे ग्रामपंचायतीनी आंदोलनास पाठिंबा दिला होता. या गावातील पदाधिकारी व नागरिकांनी रस्त्यावर उतरून आंदोलनात सहभाग घेतला. यावेळी चौकात गतिरोधक बसवणे, लाइटची व्यवस्था करणे, रस्त्यांवरील खड्डे बुजविणे, साइड पट्ट्यांची साफ सफाई व बिबट हल्ल्यांबाबत उपाययोजना करणे, अशा मागण्या करण्यात आल्या. यावेळी सार्वजनिक बांधकाम विभागाचे कनिष्ठ अभियंता उतळे यांना निवेदन देण्यात आले.
यावेळी शनिवारी (ता. २) झालेल्या अपघातात मृत झालेले शंकर ढोबळे यांना श्रद्धांजली वाहण्यात आली. येथील समस्यांवर मार्ग निघाला नाही, तर यापेक्षा तीव्र आंदोलन करण्याचा इशारा युवानेते अजिंक्य घोलप यांनी दिला.
यावेळी काळू शेळकंदे, मारुती वायाळ, माऊली कबाडी, संतोष ढोबळे, स्वाती कबाडी, अशोक पापडे, अविनाश ढोबळे, सुनील ढोबळे, चंद्रकांत काजळे, मनीष बुट्टे यांच्यासह ग्रामस्थ उपस्थित होते.