खळद येथे ढोल लेझीम स्पर्धेत भिवरी, बोपगाव संघ अव्वल

खळद, ता. ६ : खळद (ता. पुरंदर) येथे शंभू महादेव यात्रेनिमित्त आयोजित ढोल-लेझीम स्पर्धेत भिवरी येथील श्रीनाथ तरुण मंडळ आणि बोपगाव येथील कानिफनाथ तरुण मंडळ या संघांनी बाजी मारत यश संपादन केले. त्यांना ग्रामस्थांच्या वतीने मानाची ढाल व रोख रक्कम देऊन सन्मानित करण्यात आले.
यावेळी भैरवनाथ तरुण मंडळ सिंगापूर, काळदरी तरुण मंडळ, कालिका तरुण मंडळ मांढर, कानिफनाथ तरुण मंडळ पोखर, जानाई देवी तरुण मंडळ कोडकेंवाडी, गुरुदत्त तरुण मंडळ झेंडेवाडी, शिवशंभो तरुण मंडळ खळद यांना अनुक्रमे पुढील बक्षिसे देण्यात आली.
येथे ४ ते ६ मे दरम्यान तीन दिवस गावचा वार्षिक यात्रा उत्सव पार पडला. या वेळी येथे पहिल्या दिवशी ग्रामदैवत भैरवनाथाची तर पुढील दोन दिवस शंभू महादेवाची यात्रा पार पडली. या वेळी देवदेवतांच्या विधिवत पूजा झाल्या. सोमवारी (ता. ५) यात्रेचा मुख्य दिवस पार पडला. यावेळी संत तेल्या भुत्याच्या कावडीची मानकरी नाना महाराज खळदकर यांच्या मार्गदर्शनाखाली ढोल-ताशाच्या गजरात, फटाक्यांच्या आतषबाजीत भव्य ग्राम मिरवणूक काढण्यात आली. मंगळवारी (ता. ६) पहाटे पुरंदर तालुक्यातील खेळगड्यांसाठी छबिना (ढोल-लेझीम) स्पर्धा पार पडली. यामध्ये २२ गावच्या खेळांनी सहभाग घेतला होता. सकाळी १० वाजता गजानन बेलावडेकर लोकनाट्य तमाशा, रात्री ९ वाजता हरीश गुळीग निर्मित महाराष्ट्राची लोकधारा, लावण्य धमाका कार्यक्रम होऊन यात्रेची सांगता झाल्याचे यात्रा कमिटीचे अध्यक्ष शिवाजी कामथे यांनी सांगितले.

दुकानांची मोठी रेलचेल...
या वर्षी यात्रा काळात गावामध्ये मोठ्या प्रमाणावर दुकानांची रेलचेल पाहावयास मिळाली. खरेदीसाठी महिलांनी मोठी गर्दी केली होती, तर लहान मुलांसाठीही विविध प्रकारचे खेळ आल्याने येथे निर्माण झालेल्या उत्साही यात्रा वातावरणाचा खळदसह परिसरातील नागरिकांनी लाभ घेतला.