पशुवैद्यकीय डॉक्टरअभावी शिवरीत शेतकरी अडचणीत

खळद, ता.२१ : शिवरी (ता.पुरंदर) परिसरातील शेतकरी व पशुपालक सध्या पशुवैद्यकीय सेवांअभावी गंभीर अडचणीत सापडले आहेत. गावात नियमित पशुवैद्यकीय डॉक्टर नसल्यामुळे जनावरांचे वेळेवर उपचार होत नाहीत. यामुळे जनावरांच्या आरोग्यावर तसेच दूधउत्पादनावर विपरीत परिणाम होत आहे. या संदर्भात शिवरी येथील शिवसेनेचे गण प्रमुख नवनाथ गायकवाड यांनी निवेदन दिले आहे.
शिवरी येथे यापूर्वी कंत्राटी पद्धतीने डॉक्टर कार्यरत होते. परंतु त्यांचा करार संपल्यानंतर गावात कोणतीही पशुवैद्यकीय सेवा उपलब्ध नाही. परिणामी शेतकऱ्यांना परिणामी शेतकऱ्यांना खासगी डॉक्टरांच्या भरोशावर राहावे लागते. ज्यामुळे वेळ, पैसा व मनस्ताप सहन करावा लागत आहे.
शासनाकडून मिळणारे दूध अनुदानही शेतकऱ्यांना मिळत नाही तर सध्या दुधाला बाजारभावही नसल्याने शेतकरी हवालदील झाले आहेत. यामध्ये शासनाकडून मिळणारे अनुदान थोडाफार आधार ठरत आहे. मात्र, असे असताना डेअरी आणि पशुवैद्यकीय डॉक्टर यांच्या संयुक्त केवायसी नोंदणीशिवाय हे अनुदान बँक खात्यात जमा होत नाही. यामुळे परिसरातील अनेक शेतकऱ्यांचे लाखो रुपये अडकले आहेत.
दरम्यान, शिवरी ग्रामस्थ व शेतकरी बांधवांनी तहसीलदार, गटविकास अधिकारी, पुरंदर यांच्याकडे निवेदनाद्वारे येथे तातडीने पशुवैद्यकीय डॉक्टरची नेमणूक करण्यात यावी, जेणेकरून शेतकऱ्यांचे आर्थिक नुकसान टळेल आणि जनावरांच्या आरोग्यसेवेत सुधारणा होईल, अशी मागणी केली आहे.