खळद अंगणवाडी दुरुस्तीचा मार्ग मोकळा

खळद, ता. १० : खळद (ता. पुरंदर) येथे खंडोबाचीवाडी या वस्तीवर असणाऱ्या अंगणवाडीला पुरंदर तालुका एकात्मिक बाल विकास सेवा योजनेचे प्रकल्प अधिकारी अनिल कांबळे यांनी भेट देऊन इमारतीची व विद्यार्थ्यांच्या प्रगतीची पाहणी केली. यावेळी त्यांनी इमारतीच्या दुरुस्तीबरोबरच, शौचालय दुरुस्ती तसेच विद्यार्थ्यांसाठी स्मार्ट टीव्ही उपलब्ध करून देण्याचे सांगितले.
येथील इमारतीच्या छतातून पाण्याची गळती होत असून ती धोकादायक झाली आहे. इमारतीची तातडीने दुरुस्ती होणे गरजेचे असल्याने याबाबत ग्रामपंचायत तथा एकात्मिक बाल विकास सेवा योजना यांच्याकडे दुरुस्तीसाठी अंगणवाडीच्या वतीने मागणी केली होती. याप्रसंगी सांख्यिकी विस्तार अधिकारी बाळकृष्ण काकडे, ग्रामपंचायत सदस्य योगेश कामथे, अंगणवाडी सेविका सीमा रासकर, मदतनीस सविता कामथे, ग्रामस्थ बाळासाहेब कामथे, अक्षय कामथे, अनिता कामथे, दशरथ कामथे, आशा आबनावे आदी उपस्थित होते.