वीटभट्टी व्यावसायिकांची साडेसहा लाखांची फसवणूक

कडूस, ता. १४ : वीटभट्टी व्यावसायिकांकडून मोठी रक्कम उचल म्हणून घ्यायची अन् रातोरात फरारी व्हायचे, असे प्रकार सध्या वीटभट्टीवरील मजूर व कामगारांचे मोठ्या प्रमाणात वाढले आहेत. यातून वीटभट्टी व्यावसायिकांची लाखो रुपयांची फसवणूक होत आहे. सुमारे साडेसहा लाख रुपयांची फसवणूक झाल्याने महाळुंगे इंगळे (ता. खेड) येथील वीटभट्टी मालक स्वप्नील रमेश जगताप यांनी पिंपरी-चिंचवड पोलिस आयुक्त कार्यालयाकडे वीटभट्टी कामगारांच्या विरोधात तक्रार केली आहे.
वीटभट्टी कामगार व एजंट यांना जगताप यांनी वीटभट्टीवर कामासाठी पैसे दिले होते; परंतु हे कामगार पळून गेले. यामुळे जगताप यांचे वीटभट्टीचे काम रखडले असून लाखो रुपयांचे आर्थिक व व्यावसायिक नुकसान झाले आहे. याबाबत जगताप यांनी अहिल्यानगर जिल्ह्यातील वडगाव सावताळ येथील प्रदीप सोनबा माळी, पोपट कुशाबा बर्डे व पत्नी आशाबाई बर्डे, भाऊसाहेब रानबा पवार व पत्नी वैशाली पवार, काबू हिरामण बर्डे व पत्नी नंदिनी बर्डे, संदीप सोनबा माळी व पत्नी पल्लवी माळी, किशोर भानुदास बर्डे व पत्नी मोनिका बर्डे, मगन रामदास वाघ व पत्नी बारकाबाई वाघ तसेच यवतमाळ जिल्ह्यातील फेत्री येथील गोविंद रामभाऊ बेले व पत्नी रेखा बेले, सतीश मोतीराम कांबळे व पत्नी माया कांबळे, विजय श्रीराम मानतुटे व पत्नी नीता मानतुटे, सुखदेव सोनबा मानतुटे व पत्नी रखमा मानतुटे, धनराज साखरे व राकेश बर्डे यांच्या विरोधात तक्रार दिली आहे.