काळेवाडीत ट्रकला धडकून पिकअपचा चालक जखमी

पळसदेव, ता. ४ : पुणे- सोलापूर महामार्गावर काळेवाडी क्र. १ (ता. इंदापूर) येथे मंगळवारी (ता. ४) सकाळी १० वाजण्याच्या सुमारास पिकअपची पुढे चाललेल्या ट्रकला धडक बसली. या अपघातात पिकअपचा चालक जखमी झाला. विठ्ठल याडाहल्ली प्रसाप्पा (वय ३५, रा. गोविंद कोप, तुलसी गिरी, बागलकोट, कर्नाटक), असे त्याचे नाव आहे. त्याला भिगवण येथील खासगी रुग्णालयात उपचारासाठी दाखल केले आहे.
याबाबत महामार्ग पोलिसांनी माहिती दिली की, सोलापूरकडे चाललेल्या ट्रकला (क्र. एम.एच.१२ एस. एक्स. ७०९७) काळेवाडी गावच्या हद्दीत पाठीमागून आलेल्या पिकअप जीपची (क्र. के.ए.२९ सी. ३१२४) जोरदार धडक बसली. या अपघातामध्ये पिकअप ट्रकमध्ये अडकली. त्यात पिकअपचा चालक जखमी झाला. महामार्ग पोलिस, एनएचएआयचे जवान व क्रेनच्या साह्याने चालकाला बाहेर काढून वाहने बाजूला घेण्यात आली. जखमी चालकाला खासगी रुग्णवाहिकेतून भिगवण येथील खासगी रुग्णालयात उपचारासाठी पाठविण्यात आले.