संजय गांधी योजनेचे लाभार्थी निराधार

पळसदेव, ता. १६ ः संजय गांधी निराधार योजनेतून दरमहा दीड हजारांचे अनुदान मिळण्यापासून इंदापूर तालुक्यातील शेकडो लाभार्थी वंचित राहिले आहेत. गेल्या चार ते पाच महिन्यांपासून या योजनेतून निराधारांना मिळणारे अनुदान रखडल्याने लाभार्थ्यांकडून नाराजी व्यक्त होत आहे.
तालुक्यातील सुमारे १० हजारांहून अधिक निराधारांना या योजनेच्या माध्यमातून दरमहा दीड हजार रुपये अनुदान दिले जाते. लाभार्थ्यांना आयुष्याच्या अखेरच्या टप्प्यातील खडतर जीवन जगताना या तुटपुंज्या रकमेचा काही अंशी टेका मिळत आहे. मात्र, हे अनुदान वेळेत मिळत नसल्याची तक्रार लाभार्थ्यांकडून कायम होताना दिसते.
वयाच्या सत्तरीकडे वाटचाल करत असलेल्या व अपंगत्वाकडे दुर्लक्ष करून एकट्या जिवाचे टीचभर पोटाची खळगी भरण्यासाठी मिळेल तेथे काम करणाऱ्या व गेल्या पाच महिन्यांपासून लाभापासून वंचित राहिलेल्या लाभार्थी केशर बापू आवाळे या महिलेने कैफियत मांडताना सांगितले, गेल्या पाच महिन्यांपासून मला लाभाची रक्कम मिळाली नाही. पैसे जमा झाल्याची चौकशी करण्यासाठी वारंवार बँकेत हेलपाटे मारून थकले आहे. केवायसी करण्यासाठी कागदपत्रे तलाठ्याकडे जमा केली आहेत. शेजाऱ्याचा मोबाईल क्रमांकही दिला आहे. पैसे मात्र अद्याप जमा झाले नाहीत. या लाभाची मला खरी गरज आहे, मात्र लाभापासून वंचित राहावे लागले आहे.

दरम्यान, तहसील कार्यालयातील या योजनेचे काम पाहणारे संजय माने म्हणाले, लाभार्थ्यांना केवायसी करणे बंधनकारक आहे. यामुळे आम्ही गावनिहाय तलाठ्याच्या माध्यमातून लाभार्थ्यांच्या याद्या पाठवून कागदपत्रे जमा करण्याच्या सूचना दिल्या होत्या. यातूनही अद्याप काही लाभार्थी केवायसी करण्याचे राहिले आहेत. त्यांनी आधार कार्ड, बँक पासबूकवरील अंतिम व्यवहार छापून व हयातीचा दाखला आदी कागदपत्रे तहसील कार्यालयात जमा करावेत.

महाडीबीटी प्रणालीव्दारे लाभार्थ्यांच्या खात्यावर अनुदानाची रक्कम जमा करण्यात येत आहे. यामुळे लाभार्थ्यांनी केवायसी करणे अनिवार्य आहे. मात्र लाभार्थ्यांना यासाठी तालुक्याला हेलपाटे मारावे लागत असल्याची बाब दुर्दैवी आहे. गरीब, गरजू व असहाय्य असलेल्या या लाभार्थ्यांसाठी प्रत्येक गावात कँम्पच्या माध्यमातून केवायसीसह अन्य समस्या सोडवून वेळेत अनुदान मिळण्यासाठी अधिकाऱ्यांनी प्रयत्न करणे गरजेचे आहे.
- सागर मिसाळ, माजी अध्यक्ष, संजय गांधी निराधार योजना समिती