दौंडला प्रांत अधिकारी नसल्याने नागरिकांची गैरसोय

कानगाव, ता. १३ : दौंड तालुक्यातील नागरिकांची गैरसोय होऊ नये यासाठी स्वतंत्र प्रांत कार्यालय दौंड येथे चालू करण्यात आले. परंतु एप्रिल महिन्यामध्ये दौंडचे उपविभागीय अधिकारी मिनाज मुल्ला यांची गोंदिया येथे अतिरिक्त जिल्हाधिकारी पदी पदोन्नती झाल्याने मुल्ला यांनी उपविभागीय अधिकारी दौंड पदाचा पदभार सोडला आहे. त्यांच्या बदलीनंतर आजतागायत दौंड तालुक्याला उपविभागीय अधिकारी यांची नियुक्ती न झाल्यामुळे तालुक्यातील नागरिकांची गैरसोय होत आहे.
गेल्या अनेक दिवसांपासून दौंड तालुक्याचे उपविभागीय अधिकारी पद रिक्त असल्यामुळे नागरिकांना विविध प्रकारचे दाखले मिळण्यास विलंब होत आहे. दौंड तालुक्याचा पदभार पुरंदरच्या उपविभागीय अधिकारी वर्षा लांडगे यांच्याकडे देण्यात आला आहे. परंतु ३१ मे नंतर झालेल्या बदल्यांमुळे पुरंदर उपविभागीय अधिकारी कार्यालयातील कर्मचारीही बदलून गेले असल्याने दौंड, पुरंदर दोन्ही तालुक्यातील नागरिकांची गैरसोय होत आहे. नुकतेच दहावी, बारावीचे निकाल लागले आहेत. तसेच महाराष्ट्र राज्य समाईक प्रवेश परीक्षा (CET) परीक्षांचे निकाल लागले असल्याने पालकांची प्रवेश प्रक्रियेसाठी धावपळ सुरू झालेली आहे. परंतु गेल्या काही दिवसापासून प्रांत अधिकारी नसल्यामुळे पालकांना जातीचा दाखला, नॉन-क्रिमीलेअर प्रमाणपत्र यांसारख्या आवश्यक कागदपत्रांसाठी नागरिकांना तालुक्यामधील सेतू सुविधा केंद्रांवर हेलपाटे मारावे लागत आहेत. मात्र, अधिकारी नसल्यामुळे अर्ज प्रलंबित राहत आहेत व लोकांना वेळेवर दाखले मिळत नाहीत.
या विलंबामुळे विद्यार्थ्यांचे शैक्षणिक नुकसान, शासकीय योजनांचा लाभ घेण्यास अडचणी आणि इतर अनेक वैयक्तिक कामांमध्ये अडथळे येत आहेत. या संदर्भात, प्रशासनाने तातडीने उपविभागीय अधिकारी यांची नियुक्ती करावी, अशी मागणी नागरिकांमधून केली जात आहे.

पुरंदर येथील प्रांत कार्यालयाचे पूर्ण कर्मचारी बदली झालेले आहेत. नवीन आलेले कर्मचारी हे कमिशनर कार्यालयाचा असल्यामुळे दाखल्या संदर्भात त्यांना लवकरच प्रशिक्षण दिले जाईल व दाखले वेळेत सुटतील.
-वर्षा लांडगे, उपविभागीय अधिकारी, पुरंदर