पाटस येथील विद्यालयात हिमोग्लोबिन तपासणी

कानगाव, ता. २२ : पाटस (ता. दौंड) येथील नागेश्वर विद्यालयामध्ये रोटरी क्लब ऑफ दौंड यांच्या सामाजिक उपक्रमांतर्गत इयत्ता ५ वी ते ९ वी मधील विद्यार्थ्यांची हिमोग्लोबिन तपासणी मोहिम राबविण्यात आली. विद्यार्थ्यांच्या आरोग्याची काळजी घेण्याच्या उद्देशाने हा उपक्रम घेण्यात आला. या तपासणी मोहिमेत ७०० विद्यार्थ्यांनी सहभाग नोंदविला. विशेष बाब म्हणजे रोटरी क्लब ऑफ दौंडमार्फत आतापर्यंत १० हजार मुलांची हिमोग्लोबिन तपासणी पूर्ण करण्यात आली आहे. तपासणीदरम्यान ज्या विद्यार्थ्यांचे हिमोग्लोबिन प्रमाण कमी आढळून आले, त्यांना रोटरी क्लबकडून तीन महिन्यांचे मोफत औषधोपचार देण्यात येणार आहेत. या प्रसंगी रोटरी क्लबचे अध्यक्ष दिपक शासन, राकेश अग्रवाल, चांगदेव शेलार, सांची गंजधने, सविता पळसुले तसेच रॉट्रॅक्ट क्लब ऑफ दौंड कॉलेजचे रॉट्रॅक्टर उपस्थित होते. याशिवाय नागेश्वर विद्यालयाचे मुख्याध्यापक, शिक्षकवर्ग यांनी उपक्रमाला सहकार्य केले.