वढू बुद्रुक येथे मुरुमाचा भराव गेला वाहून

कोरेगाव भीमा, ता. २७ : श्रीक्षेत्र वढू बुद्रुक (ता. शिरूर) ते पिंपळे जगताप-चौफुला दरम्यान सुरू असलेल्या रस्ता काँक्रिटीकरणादरम्यान नव्या मोरीच्या कामामुळे बाह्यवळणासाठी तयार केलेला तात्पुरता मुरुमाचा भराव काल ओढ्याच्या पुरामुळे वाहून गेला आहे. त्यामुळे या मार्गावरील वाहतूक अद्यापही बंदच असून दोन्ही बाजूकडील ग्रामस्थांना पर्यायी मार्गाने शिक्रापूर मार्गे वळसा घालून जावे लागत आहे.

पावसाचा धोका माहीत असताना ठेकेदाराच्या ढिसाळपणामुळे ही परिस्थिती ओढवल्याने प्रवासी व ग्रामस्थ संतप्त प्रतिक्रिया व्यक्त करीत आहेत. वढू बुद्रुक ते पिंपळे जगताप - चौफुला दरम्यान रस्ता काँक्रिटीकरणाचे काम मागील अनेक दिवसांपासून रेंगाळले असून काँक्रिटीकरणाच्या आलेल्या लोखंडी सळया व मुरुमाच्या रस्त्यावरून अक्षरशः जीव मुठीत धरून प्रवासी व ग्रामस्थांना मोठी कसरत करीत प्रवास करावा लागत आहे. या कामात वढू जवळ नव्या मोरीच्या कामासाठी जुना रस्ता मोरीसह उखडून बाह्यवळणासाठी तात्पुरत्या स्वरूपात मुरुमाचा भराव टाकण्यात आला होता. मात्र सलग दोन-तीन दिवस झालेल्या मुसळधार पावसामुळे काल ओढ्याला आलेल्या पुरात हा भराव वाहून गेला असून शेजारील शेतकऱ्यांच्या गोठ्यात व घरातही पाणी शिरल्याने मोठे नुकसान झाले आहे. पुरामुळे भराव वाहून गेल्याने दोन्ही बाजूकडील बंद झालेली या मार्गावरील वाहतूक अद्यापही सुरु झालेली नाही. त्यामुळे चांगल्या रस्त्यासाठी ग्रामस्थांना पर्यायी मार्गाने शिक्रापूर मार्गेच वळसा घालून जावे लागत आहे.
नागरिकांच्या या त्रासाला व नुकसानीला कारणीभूत ठरलेल्या या ठेकेदारावर कारवाई व्हावी, अशी मागणी संतप्त ग्रामस्थांकडून होत आहे.
दरम्यान सरपंच ज्ञानेश्वर भंडारे, ग्रामसेवक शंकर भाकरे, तलाठी रमेश घोडे, पोलिस पाटील जयसिंग भंडारे आदींनी आज प्रत्यक्ष जाऊन झालेल्या नुकसानीची पाहणी केली. तसेच हा रस्ता लवकरात लवकर पुर्ववत करण्यासाठी व वाहून गेलेल्या पुलाचे काम लवकरात लवकर व्हावे, यासाठी संबंधित कंत्राटदार तसेच अधिकाऱ्यांकडे पाठपुरावा केला आहे.

04940