वढू खुर्द बंधारा वाहतुकीसाठी धोकादायक

केसनंद, ता. १९ : धर्मवीर छत्रपती संभाजी महाराजांचे समाधिस्थळ असलेल्या श्रीक्षेत्र वढू बुद्रुक व वढू खुर्द (ता. हवेली) गावाला जोडणाऱ्या भीमा नदीवरील कोल्हापूर पद्धतीच्या बंधाऱ्याची व तेथील जोडरस्त्याची खड्ड्यांमुळे दुरवस्था झाली आहे. स्थानिकांसह येथे येणारे शंभुभक्त व पर्यटकही या मार्गाचा वापर करीत असल्याने एकही सुरक्षाखांब नसलेला हा बंधाऱ्यावरील मार्ग धोकादायक बनला आहे.
तसेच कोरेगाव पुलाला पर्याय व वढू- तुळापूरचे दळणवळण वाढवण्यासाठी नवीन पर्याय म्हणून शेजारीच बांधण्यात येत असलेल्या २२ कोटी ८६ कोटी खर्चाच्या नव्या पुलाचे कामही अत्यंत संथ गतीने सुरू असल्याने स्थानिकांसह शंभुभक्तांमध्ये संतापाची भावना आहे.
शिरूर तालुक्यातील श्री क्षेत्र वढू बुद्रुक, तसेच हवेली तालुक्यातील श्री क्षेत्र तुळापूर या छत्रपती शंभुराजांच्या बलिदान स्थळांचा ऐतिहासिक व जागतिक दर्जाच्या स्मारकाच्या माध्यमातून विकास होत आहे. या दोन्ही स्थळांमधील सध्याचे कोरेगाव भीमा मार्गे प्रवासाचे असलेले अंतर कमी व्हावे, तसेच वाहतूक कोंडीही कमी होऊन दळणवळण वाढावे, या उद्देशाने वढू बुद्रुक ते वढू खुर्द दरम्यान भीमा नदीवर नव्या पुलाला शासनाकडून मंजुरी देण्यात आली. एकूण २४ महिन्यांची मुदत असलेले हे काम गेले दोन वर्षापासून हे काम सुरू आहे. आजवर भीमा नदीत दोन्ही बाजूने पिलर टाकण्याचे काम बहुतांश पूर्ण करण्यात आले. मात्र, मुख्य प्रवाहातील मधले पिलर, तसेच दोन्ही बाजूंच्या भरावासाठीचे महत्त्वाचे काम अद्यापही बाकी आहे.
या पार्श्वभूमीवर बंधारा मार्गाची तातडीने दुरुस्ती, तसेच पर्यायी नव्या पुलाचे काम तातडीने पूर्ण होणे गरजेचे आहे. मात्र, प्रशासनाकडून ही बाब गांभीर्याने घेऊन वेगवान हालचाली होताना दिसत नाहीत.

नवीन पुलाची प्रतिक्षा
श्रीक्षेत्र वढू बुद्रुक व तुळापूर या तीर्थस्थळी राजांचे भव्य स्मारक उभारले जात असल्याने येथे येणाऱ्या शंभुभक्त व पर्यटकांची संख्या दिवसेदिंवस वाढत आहे. होणाऱ्या या नवीन पुलामुळे केवळ तीर्थक्षेत्रेच नव्हे, तर या पूर्ण परिसरातील दळणवळण व सर्वांगिण विकासालाही मोठी चालना मिळणार असल्याने या नव्या पुलाची स्थानिकांसह शंभुभक्त पर्यटकांनाही प्रतिक्षा आहे.