केसनंदला तरुणाकडून नऊ किलो गांजा जप्त

केसनंद, ता. २७ : केसनंद फाटा (ता. हवेली) येथे गांजा विक्रीसाठी आलेल्या एकास शनिवारी (ता. २६) सायंकाळी गुन्हे शाखा युनिट सहाच्या पथकाने ताब्यात घेत नऊ किलो गांजा जप्त केला. कुणाल दीपक गुरव, (वय २९, रा. हिंदू व्यायाम शाळेजवळ, शहादा, जि. नंदूरबार), असे त्याचे नाव आहे. त्याच्याविरुद्ध वाघोली पोलिस ठाण्यात गुन्हा दाखल केला आहे.
या प्रकरणी पोलिसांनी दिलेल्या माहितीनुसार, गुन्हे शाखा युनिट सहाचे पथक शनिवारी सायंकाळी वाघोली पोलिस ठाण्याच्या हद्दीत गस्त घालत असताना ऋषीकेश व्यवहारे यांना केसनंद फाटा चौकाजवळ वाहन पार्किंगच्या मोकळ्या जागेत कुणाल गुरव हा पांढरे रंगाच्या पिशवीत काहीतरी लपवत असल्याबाबत दिसला. त्याकडे जात असताना तो पळून जाऊ लागल्याने पथकाने त्याचा पाठलाग करून ताब्यात घेतले. त्याच्या ताब्यातून एकूण एक लाख ८३ हजार ६०० रुपये किमतीचा ९ किलो ३५० ग्रॅम वजनाचा गांजा जप्त केला. त्यास पुढील तपास कामी वाघोली पोलिसांकडे स्वाधीन केले.
ही कामगिरी युनिट सहाचे प्रभारी पोलिस निरीक्षक वाहिद पठाण, युनिट पाचचे पोलिस निरीक्षक संजय पतंगे, सहायक पोलिस निरीक्षक मदन कांबळे, सारंग दळे, नीलेश साळवे, निर्णय लांडे, गिरीश नाणेकर, प्रशांत कापुरे, ऋषिकेश व्यवहारे, सचिन पवार, ऋषिकेश ताकवणे, बाळासाहेब तनपुरे, नेहा तापकीर, प्रतीक्षा पानसरे यांच्या पथकाने केली.