वढू बुद्रूक ३००१ दिव्यांनी प्रकाशमान

कोरेगाव भीमा, ता. २ : श्रीक्षेत्र वढू बुद्रूक (ता. शिरूर) येथे त्रिपुरारी पौर्णिमेनिमित्त धर्मवीर छत्रपती संभाजी महाराज समाधीस्थळी ३००१ दिवे लावून दीपोत्सव साजरा करण्यात आला. यावेळी स्वर संध्या भजनी मंडळाच्या भाव गीतांनी व हरिनामाच्या गजराने परिसर दुमदुमून गेला होता.
श्री शिवप्रतिष्ठान हिंदुस्थान, धर्मवीर संभाजी महाराज स्मृती समिती व श्रीक्षेत्र वढू बुद्रूक ग्रामस्थांच्या वतीने येथे दरवर्षी दीपोत्सव साजरा केला जातो. यावर्षी शिवप्रतिष्ठानच्या धारकरी व शिवशंभू भक्तांनी रोषणाईसह ३००१ दिवे प्रज्वलित केले. यावेळी गुरुनानक जयंती व कार्तिकी एकादशी निमित्ताने श्रीगुरुनानक व विठ्ठलाचीही रांगोळी काढण्यात आली होती. याप्रसंगी शोभेची आतषबाजीही करण्यात आली. दीपोत्सवासाठी पंचक्रोशीतील विविध गावचे धारकरी व प्रमुख पाहुणे उपस्थित होते.