वाखारी येथील अपघातात लातूरमधील महिला ठार

केडगाव, ता. ५ : पुणे- सोलापूर महामार्गावर वाखारी (ता. दौंड) येथे शुक्रवारी (ता. ५) सायंकाळी पाच वाजता दोन वाहनांची समोरासमोर धडक होऊन झालेल्या अपघातात एक महिला ठार झाली. तर, त्यांचे पती गंभीर जखमी झाले.
सारिका शीलवंत गायकवाड (वय ४०) हे या अपघातात जागीच ठार झाल्या. तर, त्यांचे पती शीलवंत शांतकुमार गायकवाड (वय ४५, दोघेही रा. हातोसी, ता. निलंगा, जि. लातूर) हे गंभीर जखमी झाले.
हा अपघात वाखारी येथे ‘निर्माण हॉटेल’समोर झाला. एका दुचाकीस्वाराला वाचविण्याच्या प्रयत्नात गायकवाड यांची मोटार दुभाजकाला धडकली. या धडकेत गायकवाड यांच्या मोटारीचा टायर फुटला आणि मोटार विरुद्ध दिशेच्या लेनमध्ये जाऊन अन्य वाहनाला धडकली. अपघातात गायकवाड दांपत्य अडकले होते. स्थानिक रहिवाशांनी मोठे प्रयत्न करून त्यांना बाहेर काढून रूग्णालयात दाखल केले. हॉटेलचे मालक दत्ता हंडाळ यांनी गायकवाड दांपत्यांना चौफुल्यातील पाटील रूग्णालयात दाखल केले. मात्र, सारिका यांचे उपचारापूर्वीच मृत्यू झाल्याचे डॉक्टरांनी सांगितले. शीलवंत गायकवाड यांना पुढील उपचारासाठी लोणी काळभोर येथील रूग्णालयात दाखल केले आहे.
दरम्यान, गायकवाड दांपत्य हे वंचित विकास आघाडीचे प्रमुख डॉ. प्रकाश आंबेडकर यांचे नातेवाईक आहेत. आंबेडकर यांनी डॉ. पाटील यांच्याशी संपर्क साधून उपचाराबाबत माहिती घेतली.