कला केंद्रातील गोळीबारप्रकरणी चार जणांवर गुन्हा दाखल

केडगाव, ता. २३ ः वाखारी (ता. दौंड) येथील न्यू अंबिका कला केंद्रात हवेत गोळीबार करून दहशत निर्माण करणाऱ्या चार जणांवर यवत पोलिसांत गुन्हा दाखल केल्याची माहिती अतिरिक्त पोलिस अधीक्षक गणेश बिरादार यांनी पत्रकार परिषदेत दिली.
दरम्यान, राजकीय पदाधिकाऱ्यांशी संबंधित नातेवाईकाने हा प्रकार केल्याच्या चर्चेने पुणे जिल्ह्यात एकच खळबळ उडाली. या संदर्भात अंबिका कला केंद्राचे व्यवस्थापक बाबा अंधारे (रा. वाखारी) यांनी फिर्याद दिली आहे. फिर्यादीनुसार पोलिसांनी बाबासाहेब मांडेकर, चंद्रकांत मारणे, गणपत जगताप व अन्य एक अनोळखी (पूर्ण नाव व पत्ता माहिती नाही ) यांच्यावर गुन्हा दाखल केला आहे. आरोपींवर शांतता भंग करणे व शस्त्र कायद्यानुसार गुन्हे दाखल केले आहेत.
यावेळी अतिरिक्त पोलिस अधीक्षक बिरादार म्हणाले, ‘‘कला केंद्रात सोमवारी (ता. २१) मध्यरात्री गोळीबार झाला. मात्र, याबाबत फिर्याद द्यायला कोणी पुढे आले नाही. समाज माध्यमावर कला केंद्रात गोळीबार झाल्याची चर्चा चालू होती. पोलिसांनी दौंड तालुक्यातील वाखारी, चौफुला, देऊळगाव गाडा येथील कलाकेंद्रात कसून चौकशी केली. मात्र, प्रत्येक कला केंद्राच्या व्यवस्थापनाने हा प्रकार आमच्या येथे घडला नसल्याचे पोलिसांना सांगितले. त्यामुळे पोलिस संभ्रमात होते. बुधवारी (ता. २३) वाखारीतील अंबिका कला केंद्रातील कामगारांना पोलिसांनी विश्वासात घेतल्यानंतर बाबा अंधारे यांनी गोळीबार झाल्याची माहिती दिली. फिर्यादीनुसार गुन्हा दाखल आहे.
हे प्रकरण राजकीय दबावाखाली असल्याचा आरोप पोलिसांनी फेटाळला आहे. एका आमदाराच्या भावाने हा गोळीबार केल्याची चर्चा झाल्याने जिल्ह्यात खळबळ उडाली होती. आमदार रोहित पवार यांनी याबाबत ट्विट केल्यानंतर तपासाला गती आली. पोलिसांनी तीनही कला केंद्रातील सीसीटीव्ही ताब्यात घेतले आहेत.