पशुधन विकास अधिकारी डॉ. आव्हाड यांचा गौरव

केडगाव, ता. २५ : शासनाच्या १०० दिवसांची कार्यदक्षता सुधारणा विशेष मोहीम या राज्यव्यापी उपक्रमांतर्गत तालुका स्तरावरील उत्कृष्ट कार्यासाठी पुणे विभागात प्रथम क्रमांक मिळविण्याचा मान पशुधन विकास अधिकारी डॉ. चैत्राली अशोक आव्हाड यांना प्राप्त झाला आहे. त्यामुळे उपमुख्यमंत्री अजित पवार यांच्या हस्ते त्यांना प्रशस्तिपत्र देऊन गौरवण्यात आले.
राज्य शासनामार्फत देण्यात आलेल्या या प्रशस्तिपत्रावर मुख्यमंत्री देवेंद्र फडणवीस, उपमुख्यमंत्री अजित पवार व एकनाथ शिंदे यांच्या स्वाक्षऱ्या आहेत. यावेळी विभागीय आयुक्त डॉ. चंद्रकांत पुलकुंडवार, जिल्हाधिकारी जितेंद्र डुडी, जिल्हा परिषदेचे मुख्य कार्यकारी अधिकारी गजानन पाटील, अतिरिक्त मुख्य कार्यकारी अधिकारी चंद्रकांत वाघमारे, पशुसंवर्धनचे प्रादेशिक सहआयुक्त डॅा. समीर बोरकर, शालिनी कडू, श्रीकांत खारत, संजय नाईकवडे आदी अधिकारी उपस्थित होते.
दरम्यान, डॅा. चैत्राली आव्हाड यांनी पशुवैद्यकीय दवाखान्यात लोकसहभागातून ‘बोलका’ (विविध रंगीत भीत्तीचित्रे ) दवाखाना, शेतकऱ्यांसाठी वाचनालय, ऑपरेशन थिएटर, प्रयोगशाळा असे नावीन्यपूर्ण उपक्रम सुरू केले. या सुविधांमुळे पशुपालक शेतकरी समाधान व्यक्त करत आहेत.
03919