चिखलगावात आज शिवजयंती मिरवणूक

कोळवण, ता. १८ : चिखलगाव (ता. मुळशी) येथे बुधवारी (ता.१९) धर्मवीर प्रतिष्ठान व ग्रामस्थांच्या वतीने शिवजयंती उत्सव साजरा करण्यात येणार असून, दिवसभरात विविध कार्यक्रमांचे आयोजन केले आहे. त्यामध्ये बुधवारी सकाळी ९ वाजता किल्ले लोहगडावरून चिखलगाव येथे शिवज्योतीचे आगमन आणणार आहे. सायंकाळी ४ वाजता चिखलगावपासून पौडपर्यंत दुचाकी मिरवणूक होईल. सायंकाळी ४.३० वाजता पौड येथील छत्रपती शिवाजी महाराजांच्या पुतळ्यास पुष्पहार अर्पण केल्यानंतर सायंकाळी ५ वाजता छत्रपती शिवाजी महाराजांची टाळ- मृदंगाच्या घोषात भव्य पालखी मिरवणूक होईल. पालखीसाठी मृदुंग ताल साधना वारकरी गुरुकुल, काशिगमधील विद्यार्थी साथ करणार आहेत. त्यानंतर खास महिलांसाठी खेळ पैठणीचा सन्मान लाडक्या महिलांचा हा कार्यक्रम होईल. त्यानंतर
हरिपाठ होईल. सायंकाळी ७ वाजता पांडुरंग महाराज शितोळे यांचे कीर्तन होणार आहे.