कोळवण ते पौड मार्गावर मोफत बससेवा सुरू

कोळवण, ता. १९ : चाले (ता. मुळशी) येथील पुलाचे काम सुरू आहे, तसेच आता पावसाळादेखील सुरू झाला आहे. वाहनचालकांच्या सोयीसाठी तयार केलेला बाह्यवळण मार्ग पाण्याखाली गेल्याने सुरक्षिततेचा उपाय म्हणून हा रस्ता वाहतुकीसाठी बंद केला आहे. कोळवण खोऱ्यातील सोळा गावांचा या रस्त्याने वाहतुकीचा संपर्क तुटल्याने बससेवा बंद केली. यामुळे परिसरातील नागरिक, शालेय व महाविद्यालयीन विद्यार्थी, ज्येष्ठ नागरिक, महिलांची मोठी गैरसोय झाली होती. ही बाब आमदार शंकर मांडेकर यांच्या निदर्शनास राष्ट्रवादी काँग्रेस पार्टीचे तालुकाप्रमुख अंकुश मोरे, जिल्हा परिषदेचे माजी सदस्य शांताराम इंगवले, मुळशीचे माजी सभापती रवींद्र कंधारे, महादेव दुडे, बबन धिडे, यशवंत गायकवाड यांनी आणून दिली व त्यावर तत्काळ उपाययोजना करत मांडेकर यांनी कोळवण खोऱ्यातील नागरिक व विद्यार्थ्यांच्या वाहतुकीसाठी मोफत बससेवा बुधवारी (ता. १८) सुरू केली आहे. यामुळे नागरिकांना व विद्यार्थ्यांना मोठा दिलासा मिळाला आहे. मोफत बससेवा प्रवासासाठी ९९२२४६६१७१, ९८२२४४६१७१ (सचिन भरम) यांच्याशी संपर्क साधावा, असे आवाहन केले आहे.

बसचा मार्ग व वेळ
सकाळी- ६.३० वा.
कोळवण-चाले-हनुमान चौक-घोटावडे फाटा-पौड एसटी स्टॅंड
दुपारी १२ वा.
पौड-घोटावडे फाटा-हनुमान चौक-घोटावडेगाव-चाले-कोळवण
दुपारी ४.३० वा.
कोळवण-चाले-घोटावडेगाव-हनुमान चौक-घोटावडे फाटा-पौड एसटी स्टॅंड
सायं.- ६ वा.
पौड-दारवलीगाव-भरेफाटा-हनुमान चौक-घोटावडेगाव-चाले-कोळवण

चाले येथील पुलाचे काम पूर्ण होईपर्यंत कोळवण खोऱ्यातील विद्यार्थी व नागरिकांसाठी ही मोफत बससेवा सुरू राहणार आहे. तरी मोफत बससेवेचा कोळवण खोऱ्यातील नागरिक, विद्यार्थी व कामगारांनी लाभ घ्यावा.
- शंकर मांडेकर, आमदार (भोर-राजगड-मुळशी)