कोळवणमध्ये गुरुकुल संस्थेचा वर्धापन दिन

कोळवण, ता. २३ : मुळशी तालुक्यातील गरीब विद्यार्थ्यांना वारकरी संप्रदायाचे शिक्षण घेता यावे म्हणून शुभम महाराज शिंदे यांनी मृदंग तालसाधना वारकरी गुरुकुल संस्थेची स्थापना केली. या संस्थेचा शंभरावा वर्धापन दिन साजरा होवो अशा सदिच्छा शितोळे शास्त्री यांनी मृदंग वारकरी गुरुकुल संस्थेस कीर्तनाच्या माध्यमातून दिल्या.
मुळशी तालुक्यातील मृदंग तालसाधना वारकरी गुरुकुल संस्थेचा सहावा वर्धापनदिन शनिवारी (ता. २२) घोटावडे येथील जयसुचंद्रिका मंगल कार्यालयात उत्साहात साजरा झाला. मृदंग अलंकार शुभम महाराज शिंदे यांनी सुरु केलेल्या या संस्थेत सुमारे शंभर विद्यार्थी वारकरी सम्प्रदायाचे शास्त्रोक्त पद्धतीने शिक्षण घेत आहेत. गुरुकुल मधील विद्यार्थ्यांनी शिंदे यांचा गुरुपूजन सोहळा केला. यानंतर पांडुरंग शास्त्री शितोळे यांचे कीर्तन झाले. तसेच समाजासाठी विविध क्षेत्रात
उल्लेखनीय काम करत असलेल्या मंदार स्वामी येणपूरे, अंकुश महाराज साठे, नामदेव सातपुते, छबन मातेरे, पंढरीनाथ दुधाणे, साहेबराव भेगडे, वसंत सुर्वे, किसन मालपोटे, यशवंत गायकवाड, राजेंद्र धुमाळ या मान्यवरांचा शाल श्रीफळ व स्मृतिचिन्ह देऊन सन्मान करण्यात आला.