कोळवण येथे माजी विद्यार्थ्यांच्या स्पर्धांना यश

कोळवण, ता. २४ ः कोळवण (ता. मुळशी) येथील न्यू इंग्लिश स्कूलमध्ये माजी विद्यार्थ्यांनी शाळा स्तरीय स्पर्धांचे आयोजन केले होते. या स्पर्धेचा उद्देश विद्यार्थ्यांच्या क्रीडा-कला गुणांना वाव देणे हा होता. १७ ते २१ नोव्हेंबर या कालावधीत झालेल्या या स्पर्धांचे बक्षीस वितरण शनिवारी (ता. २२) शाळेच्या प्रांगणात करण्यात आले. विजेत्या स्पर्धकांना प्रमाणपत्र, मेडल, सन्मानचिन्ह देण्यात आले. यावेळी न्यू इंग्लिश स्कूल कोळवण माजी विद्यार्थी संघटनेचे काशिग, हाडशी, वाळेण, साठेसाई, भालगुडी, डोंगरगाव, होतले, नांदगाव, चिखलगाव येथील सर्व माजी विद्यार्थी उपस्थित होते.
या स्पर्धेमध्ये व्हॉलीबॉल, खो-खो, कबड्डी, धावण्याच्या स्पर्धा, निबंध, वक्तृत्व, चित्रकला, सुंदर हस्ताक्षर व हस्तकला स्पर्धा यांचा समावेश होता.
‘‘यापुढे शिष्यवृत्ती परीक्षा, एनएमएसएस यांसारख्या परीक्षांसाठी संबंधित विषयातील तज्ज्ञ शिक्षकांना बोलावून विद्यार्थ्यांना मार्गदर्शन करण्याचा प्रयत्न करणार आहोत. तसेच, क्रीडा स्पर्धांमध्ये यशस्वी विद्यार्थ्यांना पुढील स्पर्धांसाठी प्रोत्साहन दिले जाणार आहे. इयत्ता दहावीच्या विद्यार्थ्यांना पुण्यातील नामांकित शिक्षण संस्थांमधील विषय तज्ज्ञांकडून सराव, एकवीस अपेक्षित प्रश्नसंचांचे वाटपही करण्यात येणार आहे,’’ असे माजी विद्यार्थी संघटनेने यावेळी आश्वासन दिले.