कोंढापुरीत ओव्हरटेकवरून ट्रकचालकाला जबर मारहाण

शिक्रापूर, ता. ३ : पुणे- अहिल्यानगर महामार्गावर समोरून चाललेल्या ट्रकने पुढे जाण्यासाठी बाजू दिली नसल्याच्या कारणाने जाब विचारणाऱ्या मागील बाजूच्या ट्रकचालकाला मित्रांना बोलावून बेदम मारहाण केल्याचा प्रकार नुकताच कोंढापुरी (ता. शिरूर) येथे घडला. या मारहाणीत सागर तानाजी धुमाळ (वय २७, रा. पिंपळे खालसा, ता. शिरूर) हा ट्रकचालक गंभीर जखमी झाला. याप्रकरणी कोंढापुरीतील तिघांच्या विरोधात शिक्रापूर पोलिसांनी गुन्हा दाखल केला आहे.
याबाबत शिक्रापूर पोलिसांनी माहिती दिली की, पुणे- अहिल्यानगर महामार्गावरील कोंढापुरी येथून सागर धुमाळ हा युवक त्याच्या ताब्यातील ट्रक घेऊन अहिल्यानगरच्या दिशेने जात होता. यावेळी त्याने समोरून आडवा चाललेल्या ट्रकला हॉर्न देऊन बाजूला होण्याचा इशारा केला. मात्र ट्रकचालकाने त्याला कुठलाच प्रतिसाद न देता बाजूही दिली नाही. यावर सागर याने त्याला ओव्हरटेक करून आपला ट्रक आडवा लावून चालकाला बाजू न दिल्याचा जाब विचारला. यावर ट्रक चालकाने त्याच्या दोन मित्रांना बोलावून घेतले व सागरला शिवीगाळ, दमदाटी करत बेदम मारहाण करून गंभीर जखमी केले. त्यात त्याच्या गळ्यातील सोन्याची चेनही गहाळ झाली. याबाबत त्याचा भाऊ अभिजित तानाजी धुमाळ (वय २३, रा. पिंपळे खालसा) यांनी शिक्रापूर पोलिस ठाण्यात फिर्याद दिली. त्यावरून पोलिसांनी सुमीत साहेबराव गायकवाड, श्‍याम रोहिदास डोंगरे, प्रबुद्ध धाम डोंगरे (तिघेही रा. कोंढापुरी, ता. शिरूर) यांच्या विरुद्ध गुन्हा दाखल केला. पुढील तपास पोलिस हवालदार कृष्णा व्यवहारे हे करत आहेत.