शिक्रापुरात दिव्यांग कामगाराला तीन महिलांसह चौघांची मारहाण

शिक्रापूर, ता. ५ : येथील एका हॉटेलमधील किचनमध्ये जाऊन दिव्यांग कामगाराला शिवीगाळ करून मारहाण करणाऱ्या पुण्यातील तीन महिलांसह लोहगावमधील एकावर शिक्रापूर (ता.शिरूर) पोलिसांनी गुन्हा दाखल केला.
याबाबत शिक्रापूर (ता. शिरूर) पोलिसांनी माहिती दिली की, शिक्रापूर येथील ‘हॉटेल शारदा’मध्ये काम करणारा दिव्यांग कामगार गोविंद नारायण शिंदे (वय ३५, रा. कुंभारवाडा, शिक्रापूर) हा हॉटेलच्या किचनमध्ये आपले दैनंदिन काम करीत असताना काही महिला या हॉटेलमध्ये आल्या व त्यांनी त्याला, ‘तू हॉटेलमध्ये बाया पुरवतो का?’ असे म्हणत शिवीगाळ व दमदाटी करीत त्याला मारहाण करण्यास सुरुवात केली. यावेळी गोविंद याने, ‘मी दिव्यांग आहे, मला मारू नका,’ अशी सतत याचना करूनही त्याला उपस्थित सर्वांनी मारहाण करून अपमानितही केले. हे चौघे एवढ्यावरच थांबले नाहीत तर त्यांनी हॉटेलमध्ये असलेल्या अन्य खोल्यांमध्ये स्वत:हून अनाधिकाराने शोधा-शोध करायला सुरवात केली. याबाबत गोविंद यांनी शिक्रापूर पोलिस ठाण्यात फिर्याद दिली. त्यावरून शिक्रापूर पोलिसांनी स्वाती विलास गायकवाड व अर्चना विशाल केदारी (दोघीही रा. ताडीवाला रोड, पुणे), संगीता वानखेडे (रा. मोशी, पुणे), महेश खांदवे (रा. लोहगाव, पुणे) यांच्याविरुद्ध गुन्हा दाखल केला. पुढील तपास पोलिस हवालदार गणेश करपे करीत आहेत.