जातेगावात पेट्रोलपंपातून दहा चाकांचा ट्रक चोरी

शिक्रापूर, ता. ११ : चाकण- शिक्रापूर रस्त्यावरील जातेगाव फाटा (ता. शिरूर) येथील एका पेट्रोलपंपात लावलेला १० चाकांचा ट्रक नुकताच चोरीला गेला. याबाबत ट्रकमालक निखिल दादाभाऊ घोलप (वय २७, रा. वाघाळे, ता. शिरूर) यांच्या फिर्यादीनुसार शिक्रापूर पोलिस ठाण्यात गुन्हा दाखल केला आहे.
वाघाळे येथील निखिल घोलप यांच्या मालकीचा दहा चाकांचा ट्रक असून, त्याचे काम संपल्यानंतर निखिल हे त्यांचा ट्रक शिक्रापूर-चाकण रस्त्यावरील जातेगाव फाटा येथील राधे राधे पेट्रोलपंपमध्ये लावून घरी जात असत. अशाचप्रमाणे शनिवारी (ता. ९) त्यांनी त्यांच्या मालकीचा ट्रक (क्र. एमएच १२ एसव्ही ५२४२) सायंकाळच्या सुमारास सदर पेट्रोलपंपामध्ये लावून ठेवला होता. शनिवारी रात्री उशिरा निखिल हे ट्रक जवळ गेले असता त्यांना ट्रक जागेवर नसल्याचे दिसून आले. त्यामुळे त्यांनी पोलिसांना माहिती देत पोलिस व मित्रांच्या मदतीने आजूबाजूला पाहणी केली असता ट्रक चोरीला गेल्याचे निदर्शनास आले. याबाबत त्यांनी शिक्रापूर पोलिस ठाण्यात फिर्याद दिली. त्यावरून पोलिसांनी अज्ञात व्यक्तीवर गुन्हा दाखल केला. पुढील तपास पोलिस हवलदार संदीप बनकर करीत आहेत.