दाजीकडून मेहुण्याला हिवरे कुंभार येथे मारहाण

शिक्रापूर, ता. १९ ः हिवरे कुंभार (ता. शिरूर) येथे मोठ्याने बोलल्यामुळे दाजीकडून मेहुण्याला मारहाण केल्याप्रकरणी शिक्रापूर पोलिस ठाण्यात गुन्हा दाखल करण्यात आला आहे.
मेहुणा बाळू माधव जगताप (वय ५०, रा. हिवरे कुंभार, ता. शिरूर) यांनी शिक्रापूर पोलिस ठाण्यात फिर्याद दिली आहे. याप्रकरणी ज्ञानेश्वर गावडे (रा. फाकटे, ता. शिरूर) यांच्या विरुद्ध गुन्हा दाखल केला आहे.
याबाबत पोलिसांनी दिलेल्या माहितीनुसार, बाळू जगताप यांची मावस बहिण असलेल्या चंद्रकला गावडे व दाजी ज्ञानेश्वर गावडे हे दोघे रक्षाबंधनसाठी नुकतेच हिवरे येथे आले होते. रक्षाबंधन अगदी हसत- खेळत पार पडले. यानंतर लगेच सगळे टिंगल- टवाळी करीत छान गप्पांमध्ये रंगले. अशातच ज्ञानेश्वर यांनी बाळू यांना अरे हळू बोल म्हटले. यावर बाळू यांनी दाजी, माझा आवाजच मोठा आहे असे म्हटले. त्यानंतर ज्ञानेश्वर यांनी बाळू यांना शिवीगाळ, दमदाटी केली. तसेच, घरातीलच काठी घेऊन थेट मारहाण करून त्याला जखमी करून केले व जीवे मारण्याची धमकी दिली. याबाबत पुढील तपास पोलिस हवालदार कृष्णा व्यवहारे हे करीत आहेत.