विरुद्ध दिशेने येणाऱ्या २० चालकांवर कारवाई

शिक्रापूर, ता. ९ : शिक्रापुरात मंगळवारी (ता.६) झालेल्या जनआंदोलनाची दखल घेऊन शिक्रापूर पोलिसांनी विरुद्ध दिशेने मोटार चालविणाऱ्या २० जणांवर पहिल्याच दिवशी कारवाई केली. त्यांच्यावर थेट गुन्हे दाखल करण्याची कारवाई सुरू केली आहे.

वाहतूक कोंडीबाबत पीएमआरडीए, सार्वजनिक बांधकाम खाते, राष्ट्रीय महामार्ग प्राधिकरण, महामार्ग पोलिसांसोबत ग्रामस्थांची शुक्रवारी (ता.१०) सकाळी १० वाजता ग्रामपंचायत कार्यालयात बैठक आयोजित केली आहे, अशी माहिती ट्रॉफिक मुक्त शिक्रापूर कृती समिती, शिक्रापूर समस्या आणि उपाय ग्रुप व शिक्रापूर पोलिसांनी दिली.
बैठकीसाठी उपविभागीय पोलिस अधिकारी प्रशांत ढोले व शिक्रापूर पोलिस निरीक्षक दीपरतन गायकवाड यांनी पुढाकार घेतला आहे. पोलिसांनी सर्व संबंधित खातेप्रमुखांना या बैठकीत निमंत्रित केले आहे. यात शिक्रापूरातील वाहतूक कोंडीला जी कारणे कारणीभूत आहेत, त्यावर ठोस कारवाई करण्याच्या दृष्टीने उपाययोजनेचा निर्णय घेतला जाणार आहे. बैठकीसाठी सणसवाडी, कोंढापूरी, कोरेगाव-भीमा, तळेगाव-ढमढेरे, जातेगाव खुर्द, जातेगाव बुद्रुक, चौफुला, पिंपळे-जगताप आदी गावांतील प्रमुख पदाधिकाऱ्यांनी यावे असेही आवाहन आयोजकांनी केले आहे.