मोटारीत गाणी लावून धिंगाणा घालणाऱ्यांवर गुन्हा

शिक्रापूर, ता. २८ : पुणे-अहिल्यानगर महामार्गावरील शिक्रापूर (ता. शिरूर)मधील चाकण चौक परिसरात गुरुवारी (ता. २७) रात्रीच्या वेळी मद्यप्राशन करून मोटारीमध्ये मोठ्याने गाणी लावून रस्त्यावर धिंगाणा घालणाऱ्या तीन युवकांवर शिक्रापूर पोलिसांनी गुन्हे दाखल करून त्यांना ताब्यात घेतले.
प्रशांत अनिल रसाळ (वय ३०, रा. तळेगाव ढमढेरे, ता. शिरूर), सौरभ अजित दरेकर (वय २७), मनोज सुरेश नवले (वय २९, दोघेही रा.शिक्रापूर, ता. शिरूर) असे ताब्यात घेण्यात आलेल्यांची नावे आहेत. तर पोलिस शिपाई रामदास सतीश जाधव (वय ३२, रा. शिक्रापूर, ता. शिरूर) यांनी फिर्याद दिली आहे. मध्यरात्री दोनच्या सुमारास पोलिस निरीक्षक दिपरतन गायकवाड, साहाय्यक उपनिरीक्षक शंकर साळुंखे, पोलिस शिपाई रामदास जाधव हे गस्त घालत असताना, पुणे-अहिल्यानगर महामार्गावरील चाकण चौक परिसरात एका मोटारी (एमएच १२ व्हीसी ८२००)ची दारे उघडी ठेवून त्यात मोठ्याने गाणी लावून काही युवक दारूच्या नशेत रस्त्यावर नाचत असल्याचे पोलिसांना दिसून आले. यावेळी पोलिसांनी त्यांना समज देत घरी जाण्यास सांगितले. यावर हे युवक काही काळ निघून गेले; मात्र पुन्हा काही वेळाने हे सर्व युवक पुन्हा त्याच ठिकाणी येऊन त्यांच्या मोटारीमध्ये मोठ्याने गाणी लावून रस्त्यावर नाचून धिंगाणा घालू लागले. यावर गस्तीवरील पोलिसांनी या तिघांनाही तत्काळ ताब्यात घेतले. पुढील तपास पोलिस हवालदार नरेंद्र गायकवाड करीत आहेत.