शिक्रापुरातून अल्पवयीन मुलीस पळविणाऱ्या तरुणाला कोठडी

शिक्रापूर, ता. ८ : येथील एका अल्पवयीन मुलीचे करणाऱ्या युवकाला शिक्रापूर पोलिसांनी अहिल्यानगर येथून ताब्यात घेतले. त्याच्यावर अपहरणाचा गुन्हा दाखल करून मुलीला तिच्या पालकांच्या ताब्यात दिले.
याबाबत शिक्रापूर पोलिसांनी सांगितले की, शिक्रापूर परिसरातील एका अल्पवयीन युवतीचे अज्ञात व्यक्तीने अपहरण केल्याची तक्रार चार दिवसांपूर्वी शिक्रापूर पोलिसांकडे दाखल झाली. याबाबत तत्काळ गुन्हा दाखल करून पोलिस निरीक्षक दीपरतन गायकवाड यांनी संशयित आरोपी शुभम अरुण घोडके (वय २९, रा. भोसले आखाडा, बुरुडगाव रोड, अहिल्यानगर) याचा ठावठिकाणा शोधून एक तपास पथक तेथे पाठविले. तपास पथकातील पोलीस हवालदार हनुमंत गिरमकर, रफिक शेख यांनी अहिल्यानगर येथील कोतवाली पोलिस ठाण्याचे पोलीस शिपाई गुलाब शेख, प्रशांत बोरुडे यांच्या मदतीने शुभम याला एका ठिकाणाहून ताब्यात घेतले. चौकशी केली असता त्याने अपहृत मुलीला त्याच्या एका नातेवाइकांच्या घरी ठेवल्याचे सांगितले. त्यानुसार पोलिसांनी मुलीला त्याच्या नातेवाइकांच्या घरातून ताब्यात घेतले. दरम्यान पोलिसांनी मुलीचा जबाब नोंदवला असता शुभम याने तिच्यावर लैंगिक अत्याचार केल्याचेही समोर आले. पोलिसांनी आरोपी शुभम याच्यावर बाललैंगिक अत्याचार आणि अपहरणाचा गुन्हा दाखल करून अटक केली. शिरूर न्यायालयाने त्याला न्यायालयीन कोठडी सुनावली. पुढील तपास सहाय्यक पोलीस निरीक्षक राहुल देशमुख करीत आहेत.