निघोजे ग्रामपंचायतीच्या उपसरपंचपदी दीपक कांबळे

कुरुळी, ता. २८ : निघोजे (ता. खेड) येथील ग्रामपंचायतीच्या उपसरपंचपदी दीपक शिवदास कांबळे हे सहा मतांनी विजयी झाले.
ग्रामपंचायत सभागृहात सरपंच सुनीता येळवंडे यांच्या अध्यक्षतेखाली उपसरपंच निवडणूक घेण्यात आली. उपसरपंच निवडणुकीसाठी दीपक कांबळे, समाधान येळवंडे, कोंडीभाऊ येळवंडे यांनी अर्ज दाखल केले. अर्जाची छाननी झाल्यानंतर माघारीच्या वेळी कोंडीभाऊ येळवंडे यांनी अर्ज मागे घेतला. सदस्यांनी सभेच्या अध्यक्षांकडे मागणी केल्यानुसार गुप्त मतदान घेतले. यावेळी १३ सदस्यांपैकी १२ सदस्य उपस्थित होते. यामध्ये कांबळे यांना नऊ मते, तर येळवंडे यांना तीन मते मिळाली.
उपसरपंच निवडणुकीत दीपक कांबळे यांचा सहा मतांनी विजय झाल्याची घोषणा सरपंचांनी केल्याची माहिती ग्रामविकास अधिकारी नितीन नाईकडे यांनी दिली. या निवडणूक प्रक्रियेत सरपंच सुनीता येळवंडे, सदस्य प्रियांका आल्हाट, छाया येळवंडे, दीपक कांबळे, अलकाबाई येळवंडे, अजित येळवंडे, सागर येळवंडे, मनीषा बेंडाले, कोंडीभाऊ येळवंडे, रूपाली येळवंडे, समाधान येळवंडे, स्नेहा फडके आदी उपस्थित होते. एक सदस्य गैरहजर होत्या. निवडणुकीवेळी महाळुंगे एमआयडीसी पोलिस ठाण्यातील पोलिस अधिकारी कर्मचारी यांचा बंदोबस्त होता. दीपक कांबळे यांचा माजी उपसरपंच, सदस्यांनी शाल, श्रीफळ व पुष्प गुच्छ देऊन सत्कार केला.