खेडमधील अवैध धंद्यांवर कारवाई करा : काळे

कुरुळी/ राजगुरुनगर, ता. ८ : खेड तालुक्यातील चाकण आणि महाळुंगे औद्योगिक परिसरात अवैध धंद्यांची हप्ते वसुलीची मोठी यंत्रणा कार्यरत आहे. या परिसरात अवैध दारू विक्री, मटका, जुगार, लॉजिंग, हॉटेल आणि गॅस रिफिलिंगसारखे बेकायदा धंदे परवाने मिळाल्यासारखे राजरोसपणे चालत आहेत. या धंद्यांमागे प्रशासनाच्या मूक संमतीने मोठी हप्ते यंत्रणा कार्यरत आहे, ज्यामध्ये काही राजकीय पदाधिकारी, त्यांचे कार्यकर्ते आणि कथित सामाजिक कार्यकर्ते सहभागी आहेत, असा दावा आमदार बाबाजी काळे यांनी विधानसभेत केला.
आमदार काळे यांनी विधानसभा अधिवेशनात खेड तालुक्यातील पोलिस विभागाच्या कारभारावरही प्रश्नचिन्ह उपस्थित केले. ते म्हणाले, ‘‘चाकण एमआयडीसी परिसरात अवैध धंद्यांमुळे कायदा व सुव्यवस्थेचा प्रश्न गंभीर झाला आहे. या धंद्यांमधून दरमहा ठराविक रक्कम प्रशासनातील काही अधिकारी आणि कथित सामाजिक कार्यकर्त्यांना दिली जाते. यामध्ये ३५ ते ४० तथाकथित सोशल मीडियावरील प्रतिनिधी आणि काही नेतेही हप्ते वसुलीत सहभागी आहेत. त्यांनी या धंद्यांमुळे स्थानिक तरुणांना रोजगाराच्या संधी मिळण्यात अडथळे येत आहेत. महाळुंगे आणि चाकण परिसरातील अवैध धंदे काहींसाठी कमाईचे साधन झाले आहे. त्यामुळे वाद आणि संघर्षाचे प्रसंगही घडत आहेत. या यंत्रणेमुळे कायदा व सुव्यवस्थेची पकड सैल झाली आहे. ही हप्ते सिस्टीम आणि त्यावर पोसलेली बोक्यांची यंत्रणा कोण उद्‍ध्वस्त करणार?’’