महाळुंगे येथे गणेशोत्सव काळात डीजेला बंदी

कुरुळी, ता. १९ ः महाळुंगे (ता. खेड) येथील एमआयडीसी पोलिस ठाण्याच्या वतीने गणेशोत्सव निमित्त गणेश मंडळाची बैठक आयोजित केली होती. यावेळी गणेशोत्सव काळात डीजे, डॉल्बी लावण्यासाठी सक्त मनाईच्या सूचना देण्यात आल्या आहेत.
महाळुंगे पोलिस ठाण्याच्या अंतर्गत येणाऱ्या सर्व गावातील गणेश मंडळाची बैठक पिंपरी चिंचवड पोलिस आयुक्तांच्या आदेशानुसार घेण्यात आली. यावेळी महाळुंगे एमआयडीसी पोलिस ठाण्याच्या सर्व गावातील विविध रस्ते, गणेश मंडळ परिसरात सीसीटीव्ही बसविणे, गणेश मंडळात एक कार्यकर्ता कायमस्वरूपी आवश्यक आहे. डीजे, डॉल्बी लावण्यासाठी सक्त मनाई आहे. डीजे, डॉल्बी ठरविण्यात आले असल्यास ते पैसे परत घ्या. लेझर लाइट वापरण्यास पूर्णपणे बंदी आहे अन्यथा गुन्हे दाखल करण्यात येतील. अनावश्यक खर्च टाळून रक्तदान शिबिर, वाचनालय सुरू करा, विविध समाजपयोगी कार्यक्रम राबवावेत, अशा सूचना वरिष्ठ पोलिस निरीक्षक दिगंबर सूर्यवंशी यांनी गणेश मंडळांना दिल्या.
यावेळी विविध मंडळाच्या अध्यक्ष, कार्यकर्ते यांनी वाहतूक कोंडीबाबत विविध ठिकाणच्या समस्या मांडल्या. विसर्जन मिरवणूक काढण्याच्या ठिकाणच्या रस्त्याच्या दुरुस्तीची मागणी केली. महाळुंगे, कुरुळी परिसरातील अनंत चतुर्थी दिवशी मुख्य रस्त्यावर वाहतूक कोंडी रोखण्यासाठी उपाययोजना करण्यात यावी, अशीही मागणी केली.
याप्रसंगी वाहतूक पोलिस विभागाचे निरीक्षक विश्वनाथ चव्हाण, पोलिस अधिकारी, शांतता कमिटी सदस्य, महिला दक्षता समिती, गणेश मंडळाचे अध्यक्ष, उपाध्यक्ष, कार्यकारिणी सदस्य आदी उपस्थित होते.