शिर्सुफळला भरणार शेळी- मेंढी बाजार

काटेवाडी, ता. २७ ः शिर्सुफळ (ता. बारामती) येथील ग्रामस्थांच्या मागणीनंतर उपमुख्यमंत्री अजित पवार यांच्या सूचनेनुसार बारामती कृषी उत्पन्न बाजार समितीच्यावतीने शिर्सुफळ येथे नव्याने शेळी- मेंढी बाजार सुरू करण्यात येणार आहे. या बाजाराचा प्रांरभ बारामती बाजार समितीचे सभापती विश्वासराव आटोळे यांचे हस्ते शुक्रवारी (ता. २८) होणार आहे.
कार्यक्रमाच्या अध्यक्षस्थानी सरपंच जुई हिवरकर, तर प्रमुख उपस्थितांमध्ये अप्पासाहेब आटोळे, हिराबाई झगडे, शिवाजी झगडे, अनिल हिवरकर आदी उपस्थित असणार आहेत. बारामती तालुक्यातील व इतर परिसरातील शेळीपालन व मेंढीपालन करणाऱ्या शेतकऱ्यांना योग्य बाजारपेठ मिळावी म्हणून हा बाजार सुरू करण्यात येत आहे. या उपक्रमामुळे मध्यस्थी कमी होऊन विक्रेत्यांना थेट खरेदीदारांशी संपर्क साधता येणार आहे. परिणामी चांगला दर मिळण्याची संधी निर्माण होणार असल्याची माहिती सचिव अरविंद जगताप यांनी दिली. पशुपालक, व्यापारी, ग्रामस्थ यांनी या उपक्रमात मोठ्या संख्येने सहभागी व्हावे, असे आवाहन बारामती कृषी उत्पन्न बाजार समितीने केले आहे.