तीनच दिवसात ८१२.६७ दशलक्ष घनफूट पाणीसाठा

काटेवाडी, ता. २६ : बारामती तालुक्यात सलग तीन दिवस पावसाने धुमाकूळ घातला असून ओढे-नाले तुडुंब भरून वाहू लागले आहेत. तालुक्यातील लघु पाटबंधारे विभागाचे प्रकल्प देखील भरले आहेत. एकूण १०३७.१६ दशलक्ष घनफूट साठ्यापैकी ८१२.६७ दशलक्ष घनफूट पाणीसाठा अवघ्या तीन दिवसात झाला आहे.
तालुक्यामधील २३७ पाझर तलाव, ४२ कोल्हापूर पद्धतीचे बंधारे, ३० वळण बंधारे, १६० साठवण बंधारे आदी प्रकल्पांमधून हे पाणी साठले आहे. पावसाचा जोर वाढत असल्यामुळे बंधाऱ्यावरील ढापे काढण्याचे काम युद्धपातळीवर जलसंधारण विभागाला करावे लागत आहे.
जलसंधारण विभागाचे कर्मचारी पावसाची पर्वा न करता बंधाऱ्यावरील ढापे काढण्याचे काम करत आहेत, अशी माहिती जलसंधारण अधिकारी केशव जोरी यांनी दिली. सर्व बंधारे ओव्हर फ्लो झाले असून कोणत्याही ठिकाणी प्रकल्पांचे नुकसान झाले नाही, असे जलसंधारण विभागाच्या वतीने सांगण्यात आले.

बारामती तालुक्यातील प्रकल्पीय पाणीसाठा

योजना संख्या क्षमता सध्याचा पाणीसाठा
पाझर तलाव २३७ ७३०.५१ ५५९.००
वळण बंधारे ४२ ४९.८२ ४२.००
साठवण बंधारे १३८ १४७.०६ ११८.४२
गाव तलाव १ १.४४ १.२५
कोल्हापूर पद्धतीचे बंधारे ४५ १०८.३३ ९२.००